Tiogray Rakaakayak Biso Maxco Missoynah Awlaytiit, Tigray Xaylo Kee Qandeh Adoytit Kee Siivil/Gabqasah Tan Reedoonu Casbit Yabbixen Marih Caagiidil Essero Xayyosen.

Tama Adoytiiti Milaaguk Lakal Mango Mirocti Kulli Dariifak Casbimtem Kassisaak, Mango Mari Laakin Tigray Xaylo Kinniimih Taagah Tigray Ummattah Garil Weeqa Tanim Kee Xaggimneh Iyyaanamih Essero Loonum Yiysixxigen.

Casbit Tn Maritte Baatil Abeenik Abe Woonay Ken Caagid Cukmi Buxa Gabat Leemih Taagah, Ummatta Salaam Kee Xacacaihj Taagah Casbit Tan Baaxo Xaylo Casbik Ruubaanam Mamqa Kee Qafuuta Mayballah Akah Takkennah Yescesse.

Ossetinah, Qidaddo Caddol, Tigray Qidaddol Akah Biyakimtannah Abeenih Axcuk Milaagi Cayli Tigray Saduh Yanim Celsiisak Akkuk Geytimta Macalitte Tanimih Taagah, Naharsi Malak Tigray Ummattah Mirac Kinniimih Taagah Addaffakot Akah Yacennah Esseren.

Gexsi Kabuk, Tigray Ummattah Garil, Federal Doolat Kee Cuggaane Baaxooxak Maysattaka Akkeleemih Bohoy Yaniimih Taagah, Naharsi Malak Ummatta Nagayniinah Ma Raddi Yaceeh Axcuk Essero Xayyoosen.

Tama Walalal, Naharsi Malaakih Kutbeh Buxak Pires Sekreteriyatih Kutbeh Buxak Saqalah Yan Gifta Nigusu Tilaahun Is Le Katuk Amaara Rakaakayat Arawah Haak Uguseh Yan Esserooral, Away Edde Geytimnam Milaagi Wakti Kinniimih Taagah Rakaakayak Baxaabaxsa Le Dariifal Casbit Geytimta Baaxo Xayloh Caagid Akah Wagiitan Innih Mabla Xayyoose.

Bahirdaar, Oroomoh Xiinissoh Rasu Kee Kalah Tan Rakaakay dariifal Tekkeh Tan Boodut Dereemeenih Casbit Geytimta Maritteh Caagid Madqa Gital Wagiitak, Qafuuta Keenih Abeenik Baaxo Dadal Kee Sittin Geyih Kaxxa Tuxxiq Allelem Kassise.

Naharsi Malak Dr. Abiy Acmad Yeceh Yan Raddil, Milaaguk Lakal, Baxaabaxsa Le Dariifal Yekke Bood Kee Milaaguk Naharat Tekke Sugte Atlaake Baatilit Arawah Haak Casbit Geytimta Baaxo Xayloh Caagid wagiitak, Siyaasa Gabat Agleh Baarisiyyah Daga Raqta Madqah Gooreh Katuk Madqa rakiibo Abak Faxxiima Raddi Akah Yaceenim Faxximtaamih Afkan Yece.

Casbit Tan Maritte Kulli Dariifak Tanimih Taagah, Baatileynit Agattiinut Arawah Haak Aban Caagid Baaxo Biyaktu Waytam Naharsi Malak Yescesse.

Casbit Yan Mari, Yafxigeenimih Gexsiti, Madqa Rakiibo Abak Takkem Faxximtam Qaddoose.

Ta Baaxo Xaylo casbik Yayyaqen Wak, Madqa Kee Adan Baxi Ceeloh Xukko Keenit Tekkek Akke Waytem Kusaaqisak, Milaagu Bisoh Haanam Kee Siyasa Gabat Agle Baarisoonuh Aban Angagoyya Kinnim Yescesse.

Tama Walalal, Tigray Kee Anaara Rakaakayitteh Katuk Ugutta Esseroora Takkay Ikkah, Gexsi Rakaakayittel Tamannah Casbit Tan Baaxo Xayloh Esseroora Wagiitaanam faxximtam Kassise.

Qidaddo Katuk Ugutte Esserooral Yeceh Yan Raddil, Miizaaniyyat Kukta Federeshin Malah Buxa Bicissamih Taagah Federal Doolat, Tigray Edde Biyakta Mabla Alle Waytam Kassisaak, Tanih Tan Dirab Yaabitte Oggol Lem Hinna Axcuk Qaddoose.

Edde Nanih Nan sanatal Tigray Rakaakayah 8.2 Biliyoonih Birrih Miizaaniyyat Akah Yibbixeenim Kee Daddos wadbah Abnissoh 400 Miliyoonih Birri Yibbixeenim Yiysixxige.

A Miizaniyyat, Rakaakayak Nabah tan Magaalolil Takkeh Tan Lee Cuggayso, Efeq Daddoosih Taamoomi, Federal Doolat Xissa Gititte, Tonnah Cuggaysoosa Edde Ane Kal Kinnim Yiysixxige.

Kulliimik Naharat, Away Gadda Kurankuraanam Hinnay, Gadda Ginaanamih Taamah Hangi yaceenim Faxximtam Yescesse.

Saay Caagiidil Tigray Ummatta, Federal Doolatih Katuk Maysattaka Yot Akkele Iyyeh Bohoy Lem Makkala Iyyeh Yan Naharsi Malaka, Ahimi Kontro-bandistitte Carbi Silaaci Qadaagah Abta Yaabitte Kinnim Yiysixxige.

Awayi Waktil Doolat, Mango Ixxima Le Kalali Qande Kee Miizaaniyyat Akah Tabixemi Tigray Rakaakayah Kinnim Qaddose.

Faxe Gital Cunxo Le Iro Maysattaka A Rakaakayal Ane Waytam Yiysixxige.

Faxe Rakaakayat Maysattaka Abta Caylitte Matan, Laakin Tah Tekkeki A Maysattaka Edde Takkem Itiyoppiya Kinnim Naharsi Malak Qaddoose.