Baadal Koroonah Vayresik Gexxaamah Rabteh Tan Maritteh Qadad 28 Alfi Gufe

Addis Ababa, Qado Dirri 19, 2012 ILL (FBC) Baad Caddol Koroonah Vayres Qideh Yan Marih Qadad 28 Alfi 717 Gufem Qaddoosen.

A Xayi Udduurih Addat Chaynak Uguteh Yan Koroonah Vayresih Dalka Baad Baaxooxa Fanah Culak Mangoh Tan Maritte Edde Rabak Geytimta.

Away Tama Vayresit Tabteh Tan Marittek Ossetinah  Baadal 615 Alfi 520 Yakke Mari Tama Dalka Ken Tibbixeh Tanim Jons Hopkins Jaamiqat Qaddosse.

30 Alfiik Daga Yakke Mari Ta Vayres Qusubih Yibbixe Marak Ameerika, Taaliyan, Espeen, Jarman, Faransa Kee Iran Baaxooxak Kinnim Warsen.

Aham Fanah Taaliyaanal Ta Vayresik Gexxaamah 9 Alfi 134 Takke Baaxo Xaylo Teetik Edde Rabtem Kee Espeen, Chayna, Iran Kee Faransa Kaaduk 1 Alfiik Daga Yakke Mari Keenik Edde Rabeh Yanim Yiysixxigen.

Espeenil Tama Vayresik Gexxaamah 24 Saaqatih Addat 823 Num Teetik Edde Rabeemik Ugut Abak Sittat 5 Alfi 134 Yakke Mari Espeenil Rabeh Yan Marih Qadad Kinnim Warsan.

Aham Fanah Espeenil 72 Alfi 248 Yakke Mari Tama Vayres Yibbixeh Geytimam Qaddoosen.

Tama Baaxo Taaliyaan Katay Ta Vayresit Kaxxam Biyaakitteh Tan Baaxo Tekkeh Geytimta.

Afrikal 46 Takke Baaxooxa Culeh Yan Koroonah Vayres 3 Alfi 778 Daga Yakke Marih Tama Vayres Yibbixeh Yanim Kee 109 Yakke Marih Qawwaddi Afrikah Qaddol Yewqeh Yanim Oyti Yascasse.

Gexsi Kabuk Baad Caddol 135 Alfiik Daga Yakke Mari Koroonah Vayresik Qaffoteenih Yaniinim Warsen.