Afrikah Baaxooxa Koroonah Vayres Abak Geytima Fixix Koositoonuh Baxaabaxsa Le Maaqatta Beyak Geytiman

Addis Ababa, Qado Dirri Mangoh Tan Afrika Baaxooxa Koroonah Vayres Abak Geytima Fixixit Koositoonuh Baxaabaxsa Le Maaqatta Beyak Geytiman.

Ugutma Chaynak Abeh Yan Koroonah Vayres Baxaabaxsa Le Baad Baaxooxa Fanah Tabak Geytima.

Away Baad Caddol Koroonah Vayres Edde Cule Baaxooxah Ixxima 160 Gufeh Yanim Warsen.

Aham Fanah Tama Vayresit 7 Alfi 160 Yakke Marih Qawwaddi Edde Awaquk, Tama Vayres Yibbixe Marih Qadad Kaaduk 182 Alfi 260 Fanah Fayya Iyyeh Geytima.

Tahak Ugut Abak Afrikahl Itiyoppiya Edde Anuk 27 Takke Baaxooxal Ta Vayres Geytimeh Yanim Qaddoosen.

Tama Baaxooxal 350 Yakke Mari Ta Vayres Yibbixeh Geytimam Kee 7 Num Kaaduk Edde Rabeh Yanim Yiysixxigen.

Afrikah Qaran Gubal Ta Vayresih Fixix Ayrook Ayro Ossimak Geytimaamak Ugut Abak Tama Baaxooxa Baxaabaxsa Le Maaqatta Beyak Geytiman.

Gabbi Afrika Ta Vayresit Koosittuh Agat Caddol Sissik Udduurih Kukta Teyyeeqeh Geytimta.

Tama Kuktaak Ugut Abak 72 Takke Cudud Culmah Fanak 35 Alifteh Geytimta.

Ossetinah Ameerika Kee Biritaaniya Edde Anuk 8 Baaxooxah Xaylo Tet Baaxo Fan Akah Cule Wan Innah Wasseh Geytimtam Warsen.

Wohuk Kalah Tama Baaxol Baritto Buxaaxi Alfimteh Tanim Kee 100 Numuuk Daga Edde Yangale Daffeyna Tonnah Qaffayda Akah Akke Waytannah Wasse.

Moroko Is le Katuk, Inkih Tan Agat Caddol Sinima Qarwa, Masaagid, Kaafe Kee Resturantitte Tonnah Ayyunti Saytunaaneh Arooca Akah Alfimtannah Abte.

Masri Kaaduk Farangi Alsak Qado Dirrik 19 Xabba Haanam Ila Qado Dirrik 31 Fanah Faxe Baaxok Tet Baaxoy, Tet Baaxok Gexsi Baaxo Fanah Gexam Maduuda Axcuk Margaqa Tatrusse.

Ahak Kalah Baritto Buxaaxi Kee Jaamiqatitte Akah Alfimtannah Abak, Ummatta Mangom Elle Tankattem Elle Dudda Qaffaydoodi Akah Akke Waytannih Margaqa Tatrusseh Tanim Oyti Yascasse.

Raceyna:- Royteris Kee BBC