Masril Afrikah Caddol Qimbo Num Koroonah Vayresik Gexxaamah Teetik Rabe
Addis Ababa, Caxah-Alsak 30, 2012 ILL (FBC) Masri Afrikak Qimboh Addah Koroonah Vayresik Gexxaamah Num Teetik Rabem Qaddoosen.
Tama Baaxok Qaafiyat Malakih Oyti Elle Yascassennal, Rabeh Yan Numu 60 Karmat Suge Jarmanah Yaakube Num Kinnim Yiysixxigen.
A Num Ayyaamak Naharat Masri Cule Num Kinnim Warsen.
Tama Num Masri Culeek Lakal Qasa Badih Qaral Geytimta Waaneh Aracak Hurgaada Hospitaalal Dayli Kattaatu Abak Suge.
Masrik Qaafiyat Malak Elle Yascassennal, Inki Ayroh Addat Dibuk 45 Yakke Qusba Mari Tama Vayres Yibbixeh Yanim Kassiisaak, Ahim Kaaduk Ta Vayres Yibbixeh Yan Marih Qadad 48 Gufeh Yanim Qaddoosen.
Ta Vayres Yibbixeh Yan Mari Doonik Safar Abeenih Yaniinim Warsan.
Away Ta Vayres Yibbixeh Yan Mari Baxissa Heenih Elle Yabbixen Footimal Kattat Keenih Abak Geytimaanam Qaddoosen.
Aham Fanah Afrikah Baaxooxal Koroonah Vayres Culeh Akak Iyyan Baaxooxak Masri Edde Edde Anuk 9 Yakken.
Tama Baaxooxal Kaaduk Aljeeriyal 17 Num, Senegaalal 4 Num, Gabbi Afrikal 3 Num, Morookol 2 Num Kaameroonul 2, Tunuziyal 1 Num, Toogol 1 Kee Nayjeerilal 1 Num Kinnuuk Amolladih 79 Yakke Mari Koroonah Vayres Yibbixeh Geytimam Qaddoosen.
Raceyna:- BBC Kee Royteris