Karawwad Wagsiisak Faxe Caagiida Itiyoppiyah Fayri Kee Tuxxiq Elle Dacrisannal Dibuk Akkelem Malokti Malah Buxa Qaddosse
Addis Ababa, Caxah-Alsak 22, 2012 ILL (FBC) Malokti Malah Buxak 80hele Madabiino Koboxul Baxaabaxsa Le Caagiidal Walalak Margaqa Tatrusse.
Tama Malah Buxa Nabah Yan Itiyoppiyah Asqassaabeh Karawwadih Caagiidil Gexisak Sugen Sittin Gey Walalih Caagiidil Walal Aben.
Tahak Ugut Abak, Ta Karawwad Wagsiisak, Faxe Caagid Itiyoppiyah Fayri Kee Tuxxiq Dacrisam Elle Duuda Gital Dibuk Akkelem Kee Agat Tuxxiq Teetik Xaga Walal Tekkek, Itiyoppiyah Doolat Annah Tan Walalat Angale Waytam Diggoysen.
Malokti Malah Buxa Afitte Daddos Kee Edde Antiffiqimiyyi Qaguntih Poolisil Walal Abte.
Afitte Poolisi Akah Bicvsaanam Faxximtemi, Afitte Ceelo Doolat Madqa Mamaxxaga Akah Tecem Takkay Ikkah, Isi Xiiqa Afitte Poolis Suge Wayteemih Taagah Afitteh Antiffiqimiyya, Dacayri Kee Dadlisiyyi Katuk Uguttah Tan Taqabitte Yafxigem Xiiqa Taama Siirat Bicsaanam Faxxiimak Sugte.
Mala Buxa Inki Inki Maysaasa Akak Abak Margaqa Tatrusse.
Mala Buxa Dacarsittoh Xiina Daddoosih Qaguntih Kuktal Walalak, Dacarsittoh Xiinah Ummattak Baxsa Le Mano, Mano Rakiibo Kee Dariifa Weelo Cubbit HaakKulli Sekterittel Kurankurimak Akkuk Sugte Poolisi Kee Istrateji Rakiibok Tan Taamoomi Inkikke Fanah Kobxisak Meqe Xalu Akah Geysisannah Abak Bicsen Poolisi Kinnim Warsen.
Tonnah Away Baaxol Edde Geytimta Dadal Caddok Ugut Abak, Inkih Tan Daddos Caylitte Dacarsittoh Xiina Manoh Maysaasah Essertimiyya Le Gurral Salaam Malak Wagittah Tan Dagorti Lih Walalak Dacarsittoh Xiina Daddoosih Kukta Bicisa Tama Malah Buxah Xayyosse.
Mala Buxa Tama Qagunti Poolisil Fidin Walal Abak Inki Inki Maysaasa Edde Abak Taamal Akah Assannah Margaqa Tatrusen.
Ciggiilak Tama Malah Buxa Laqin Dariifah Manoh Maysaasah Cuggaysoh Abbinoosiyyah 65.3 Miliyoonih SDR Lakqoh Abuudih Sittin Geyil Walal Aben.
Tama Abud, Baadak Buqre Daddoosih Fendi Lih Yekkem Kassisaak, Dacarsittoh Xiinah Kee Garab dacarsittoh Xiinah Ayyuntih Manoh Maysaasa Kee Maqarrowiyyah, Tonnah Qidaddo Tuxxiq Fayya Akah Iyyannah Hangi Abta Cuggayso Abinal Akah Assannah Kinnim Qaddoosen.
Tama Abud Tu Riba Sinnim Kee Xer Sanatih Meklal Lem Kassiisak Ummattah Awlaytiitih Malah Buxa Akah Faaticissannah Ruuben.