Sultan Macammad Celem Macammad Boddayya (Sulte) Aydaadu

Addis Ababa, Caxah-Alsak 16, 2012 ILL (FBC) Dawwe Sultan Macammad Celem Macammad Boddayya (Sulte) Aydaadu.

Sultan Macammad Celem Macammad Boddayya (Sulte)

(RACIMAHULLAH)

Sultan Macammad Celem Carri Rasih Xintok Dawwe Daqaarak Waahiloh Awdak Kaxxa Buxi Makaftal F.L.L.  Sanat 1945 Yooboke.

Sultan Macammad Celem Qunxih Diini Baritto Kee Siyaasa Buxah Addal Barte. Isih Miraacisak Suge Baaxo Kee Ummattah Addal Tayse Konnabna Kee Moddaqiinu, Meqe Ossobba Luk Suge.

Kalah Kaadu, Qadaalat, Goori, Caddi, Leek Qayso Kee Ummattâ Kacanul Amixxaguk Suge.

Sultan Macammad Dawweh Sultan Yekkem F.L.L. 1981 Yen Waqdik Ten. Dawwê Qarkayto Kay Abba Sultaan Celemik Ciggiile. Usuk, Dawwe wanoh Qarkaytoh Sultaanitittek 19^toh Sultaanak Suge.

Sultan Yekke Waqdi 36 Karmat Suge. Reedal 39 Liggida Suge. Sultaanah Akak Suge Qafar Kee Cuggaaneh Inkiih Inki Cakki Abak Inki Intit Abaluk Miraacisak Suge.

Toh Yaanam Qafar Dibuk Hinnay, Itiyoppiyak Gabbi Walloh Rakaakayat Raqta Oromo Kee Qargubbi Ummattah Inkih Miraacisak Inkim Akah Axcuk, Inkim Kah Abak Massa Le Qadaalatal, Meqe Xiinissol Miraacisak Suge.

Qafar Kee Cuggaanê Rasitteh Baaxok, Biluk Migloh Orobak, Qadli Waytok Cakkih Orobak Sugen Amoytak Suge.

Dargi Ku’amolayyoh Xinto, Inkih Tan Itiyoppiyah Ummattah Amol Sugte Kattuh Taddigilluh Tangicille Qafar Geedassima Lih, Baxaabaxsa Le Gurral Cattiimak Suge. Itiyoppiyal Federalizm Xintoy Isi Amoh Xin Ley, Demokraasii Kee Meqe Xiinissol Rakitta Geytimuh Qafar Ummatta Lih Mango Gurral Cattiime Qafár Miraacak Ten. Toh Maggo Mari Kaah Akah Sumaaqita Meqe Taamay Aydaaduh Raqteh Iyya  Kinni.

Toh Tonnal Anuk, Usuk Isih Xiinisaah Miraacisak Suge Baaxo Hinnay, Qafar Ummattah Addal Akkinaanih Bood Kee Taqabittek, Calli Geytimuh Fayuh Elle Amaatuk Sugen Sultaanak Sugte.

Kalah kaadu Itiyoppiyah Addal Geytimtah Tan Diplomatic Mission’ Faransaawi , Tilyaan kee Jappaan Ambasaddarwa kee ken Awlaytit kee Meqem Abittoh Eglaali, Mango Uddur kaal amaatuk, Qafar Rakaakayak Carri rasul aboonu waan taamak fayu kak beyak sugen.

Sultaan Macammad Celemik Addunyal 2 Gubnaay, Lab Xaylok 8, Say Xaylok 5 Raaqe. Xayloo Kee Xaylô Xaylô Fan 65 Kaak Raaqe. Karmak 75 Rabe. Isi Cakki Edde Geem, Caxah-lsak Jumqatti Ayrok 13/2012 ILL. (F.L.L. February 21, 2020)

Inna-Lillahi Wa-Inna ileyhi Raajiquun!!!

Raceyna:- Qafar Rakaakayak Doolat Angaarawih Caagiidih Kutbeh Buxa