8hayto Footima Kee 12hayto Footimak Agat Aqayyaareh Taddeera Fooca Fanah Qaddoowele – Baritto Malak
Addis Ababa, Qado Dirri 10, 2012 ILL (FBC) 8hayto Footima Kee 12hayto Footimak Agat Aqayyaare Edde Gexisan Ayro Fooca Fanah Aysixxigeloonum Baritto Malak Qaddoose.
Baritto Malaakah Yan Dr. Injiner Getahun Mekuriya, Koroonah Vayres (KOVID 19) Lakimih Kalaluh Madabiino Barittok Naharat Takke Baritto, 1hayuto Kee 2haytoh Caddoh Barittoh Buxaaxi, Tonnah Kasle Barittol Barittah Tan Barteynit Abtam Faxximta Cubbih Caagiidil Maybalaalaqa Yece.
Dr. Injiner Getahun Mekuriya Tama Maybalaalaqal, Doolat Tama Vayresih Kalaluh Ila Qado Dirrik 21 Sanat 2012 ILL Fanah 15 Ayroh Gideh Baritto Buxaaxi Alifut Geytimtam Kassiise.
Alfimteh Tan Ayroorah Addat Barteynitit Tu Taqabi Keenit Akah Boode Waytannah Baritto Miraacinni, Barseynit Kee Ayyunti Tawqeh Tan Wakti Ikraarot Miraacimak Waktit Meqennah Edde Yantiffiqimeenim Faxximtam Qaddoose.
8hayto Footima Kee 12hayto Footimah Aqayyaare Wagittaamal Addaffakot Abeh Yan Dr. Injiner Getahun Mekuriya, Barteynit Tama Ayroorah Addat Waktit Meqennah Edde Yantiffiqimeenim Faxximtam Kassiisaak, Aqayyaare Edde Gexisan Ayro Fooca Fanah Aysixxigeloonum Qaddoose.
Tama Malak Dr. Injiner Getahun Mekuriya Koroonah Vayresih Kalauh Malaak Deeta, Barteynit Xaleena Kee Barseyniti Lih Gaba Kaqaylo Abak, Barteynit Koroonah Vayres (KOVID 19) Lakimak Isinni Kee Isinni Ayyunta Cataanam Faxximtaamih Farmo Tatrusem Baritto Malaakak Geyneh Nan Oyti Yascasse.