Fana: At a Speed of Life!

የምርት ማሸጊያ በሀገር ውስጥ አለመመረት በስራችን ላይ ጫና እየፈጠረ ነው- ኢንዱስትሪዎች

0 30

አዲስ አበባ፣ ግንቦት 21፣ 2010 (ኤፍ.ቢ.ሲ) በማምረቻው ዘርፍ የተሰማሩ ኢንዱስትሪዎች ምርቶቻቸውን ወደ ገበያ የሚያቀርቡባቸው ማሸጊያዎች በሀገር ውስጥ አለመመረት በስራቸው ላይ ጫና እየፈጠረ መሆኑን ይናገራሉ።

የማሸጊያዎች እና የግብአቶች በሀገር ውስጥ በስፋት አለመገኘት ለወጭ ምንዛሬ እጥረት እንዲጋለጡ እያደረጋቸው መሆኑንም አምራቾቹ ይገልጻሉ።

የችግሩ በዘላቂነት አለመፈታትም አምራች ኩባንያዎች በሀገር ውስጥ በስፋት አለመኖራቸው መሆኑንም ነው የሚገልጹት።

የምግብ መጠጥ እና ፋርማሲዩቲካል ኢንዱስትሪ ልማት ኢንስቲትዩትም ችግሩ ለዘርፉ ማነቆ የሆነ እና ከዚህ ቀደም የተለየ መሆኑን ያምናል።

የኢንስቲትዩቱ ዋና ዳይሬክተር አቶ ሰለሞን ታደለ ከፋና ብሮድካስቲንግ ኮርፖሬት ጋር በነበራቸው ቆይታ፥ ችግሩን ሙሉ በሙሉ ለመፍታት ማሸጊያዎችን በሀገር ውስጥ ጥራታቸው ተጠብቆ እንዲመረቱ የማድረግ እንቅስቃሴ መጀመሩን ገልፀዋል።

በውጭ ሀገር የሚንቀሳቀሱ ማሸጊያ አምራች ኢንዱስትሪዎችን ወደ ሀገር ውስጥ የመሳብ እና በሀገር ውስጥ እንዲያመርቱ የማድረግ አማራጭም ተይዞ እየተሰራ ነው ብለዋል።

ለዚህም ኢንስቲትዩቱ የራሱ የሆነ አሰራርን እየዘረጋ መሆኑን ነው ዳይሬክተሩ የተናገሩት።

የውጭ ኩባንያዎች በሀገር ውስጥ እንዲሰማሩ የሚደረግበት እና በሀገር ውስጥ ያሉ ውስን ኩባንያዎች አቅማቸው እንዲያድግ የሚደረግበት ስትራቴጅ ተቀርጿል።

በስትራቴጅውም መሰረት ኩባንያዎቹ ወደ ዚህ መጥተው እንዲሰማሩ እና በሀገር ወስጥ ያሉትም ቢሆን ራሳቸውን እንዲያሻሽሉ የተለያዩ ማበረታቻዎችን የያዘና መሆኑን ነው ዳይሬክተሩ የሚያነሱት።

በዙፋን ካሳሁን

Comments
Loading...