Fana: At a Speed of Life!

ግንቦት 20 ብዝሃነትን ያከበረ ዴሞክራሲያዊ አንድነት መሰረት የተጣለበት እለት ነው – ፕሬዚዳንት ዶክተር ሙላቱ

0 37

አዲስ አበባ ፣ ግንቦት 20 ፣ 2010 (ኤፍ ቢ ሲ) ግንቦት 20 በኢትዮጵያ ብዝሃነትን ያከበረ ዴሞክራሲያዊ አንድነት መሰረት የተጣለበት እለት መሆኑን የኢፌዴሪ ፕሬዚዳንት ዶክተር ሙላቱ ተሾመ ተናገሩ።

የግንቦት ሀያ 27ኛ አመት የድል በዓል ማጠቃለያ፥ “የላቀ ብሄራዊ መግባባትና ዴሞክራሲያዊ አንድነት ለላቀ ሃገራዊ ስኬት በሚል መሪ ቃል” ዛሬ በሸራተን አዲስ ተከብሯል።

ፕሬዚዳንት ዶክተር ሙላቱ ግንቦት 20 በኢትዮጵያ ብዝሃነትን ያከበረ ዴሞክራሲያዊ አንድነት መሰረት የተጣለበት እለት መሆኑን ተናግረዋል።

በዓሉንም በሃገሪቱ እያጋጠሙ ያሉ ችግሮችን በመፍታት ማክበር እንደሚገባም ነው የተናገሩት።

ከዚህ ባለፈም ለሃገራዊ አንድነትና እድገት ለመስራት ቃል በመግባት በዓሉን ማክበር ይገባልም ነው ያሉት ፕሬዚዳንቱ።

ህብረተሰቡም ብሄራዊ መግባባትን ለመፍጠርና እየተመዘገቡ ያሉ ሃገራዊ ስኬቶችን ለማስቀጠል በጋራ ሊንቀሳቀስ ይገባልም ብለዋል።

ፕሬዚዳንቱ በንግግራቸው በውጭ የሚኖሩ ዜጎችን ደህንነት ለማስጠበቅና ተፎካካሪ የፖለቲካ ፓርቲዎች በሃገሪቱ የፖለቲካ እንቅስቃሴ ላይ ገንቢ ሚና እንዲኖራቸው የተጀመረው እንቅስቃሴ እንደሚቀጥልም አንስተዋል።

ከዚህ ባለፈም ከጎረቤትና ሌሎች ሃገራት ጋር ከጋራ ተጠቃሚነት መርህ አኳያ እየተሰሩ ያሉ ስራዎች ተጠናክረው እንደሚቀጥሉም አጽንኦት ሰጥተዋል።

ብዝሃነትን ያከበረ ዴሞክራሲ ከመራራ ትግል በኋላ መጀመሩን ያነሱት ፕሬዚዳንቱ፥ በሃገሪቱ ባለፉት ጊዜያት ተፈጥረው የነበሩ ችግሮች የልማትና የለውጥ የግፊት ማዕከል መሆናቸውን አስረድተዋል።

በውጭ ሃገራት ይንቀሳቀሱ የነበሩ ተፎካካሪ ፓርቲዎች ሃገር ውስጥ ገብተው በዓሉን ማክበራቸው ሃገራዊ አንድነት እየጎለበተ ለመምጣቱ ማሳያ መሆኑንም ጠቅሰዋል።

ዜጎችም ችግሮቻቸውን ለመፍታትና ጥያቄያቸውን ለማቅረብ በሰላማዊና በሰከነ መንገድ መፍታትና መጠየቅ እንደሚገባቸውም አስገንዝበዋል።

በበዓሉ ላይ የተገኙት የአዲስ አበባ ከተማ ከንቲባ ድሪባ ኩማ በበኩላቸው፥ ግንቦት ሀያ ኢፍትሀዊ ስርዓትን በማስወገድ አዲስ ምዕራፍ የተጀመረበት እለት መሆኑን ገልጸዋል።

በዓሉን የህዝብ ቅሬታ ምንጭ የሆኑ ችግሮችን በመፍታት ማክበር እንደሚገባም ጠቁመዋል።

በበዓሉ ላይ ፕሬዚዳንት ዶክተር ሙላቱ ተሾመን ጨምሮ ከፍተኛ የመንግስት ባለስልጣናትና ጥሪ የተደረገላቸው እንግዶች ተገኝተዋል።

Comments
Loading...