Fana: At a Speed of Life!

መንግስት ከህዝቡ እያገኘ ያለው ድጋፍ የግንቦት 20 ድሎችን ለማስፋት ተጨማሪ አቅም ነው- ፕሬዚዳንት ዶ/ር ሙላቱ ተሾመ

0 35

አዲስ አባበ፣ ግንቦት 19፣ 2010(ኤፍ.ቢ.ሲ) የኢፌዴሪ ፕሬዚዳንት ዶ/ር ሙላቱ ተሾመ በግንቦት 20 ድል 27ኛ ዓመት በዓል የመልካም ምኞት መግለጫቸው እንዳሉት አሁን ላይ መንግሰት ከህዝቡ እያገኘ ያለው ድጋፍ የግንቦት 20 ድሎችን ለማስፋፋት ተጨማሪ አቅም ነው።

በሀገሪቱ የተገኘውን የህዝብ ድጋፍና የታየውን መነቃቃት በመጠቀም የግንቦት 20 ድሎችን ለማስፋት መንግስት ትኩረት ሰጥቶ ይሰራልም ብለዋል።

የተጀመረው የህዳሴ ጉዞ እንዲሳካና የሀገሪቱ መጪ ጊዜ የተሻለ እንዲሆን የሀገሪቱ ብሄሮች፣ ብሄረሰቦችና ህዝቦች በጠንካራ የአንድነት መንፈስ መስራት እንዳለባቸውም ፕሬዚዳንቱ አሳስበዋል።

የግንቦት 20 ድል የኢትዮጵያ ፖለቲካና ኢኮኖሚ መስተጋብር መሰረታዊ በሆነ መልኩ የተለወጠበትና አጠቃላይ የሀገሪቱ ገጽታ አወንታዊ ባህሪያትን እንዲላበስ መንገድ የተጠረገበት እንደሆነም በመግለጫቸው አመላክተዋል።

የዘንድሮው የግንቦት 20 ድል በዓል የሚከበረው ባለፉት 2 አመታት ሀገሪቱ ከገባችበት ቀውስ ተላቃ ሰላምና መረጋጋት በአስተማማኝ መልኩ ተረጋግጦ መንግስትና ህዝብም በአዲስ መንፈስ አዲስ ምዕራፍ በጀመሩበት ወቅት ነው ብለዋል።

ባለፉት 27 ዓመታት የተመዘገቡ በርካታ የግንቦት 20 የድል ፍሬዎች መኖራቸውን የገለጹት ፕሬዚዳንቱ፥ እነዚህን ውጤቶች የሚፈታተኑ በርካታ ችግሮችም የነበሩ መሆናቸውን አስታውሰዋል።

አሁን ላይ መንግስትና ህዝብ እጅ ለእጅ ተያይዘው በጋራ ችግሮችን በመቀልበስ የላቀ የለውጥ ጉዞ ላይ ሲሆኑ፥ ለበለጠ ውጤትም መስራት እንዳለባቸው ነው የገለጹት።

የህዝብን መሰረታዊ ጥያቄ መመለስና የዴሞክራሲ ምህዳሩን ማስፋት ቀጣይ የመንግስት የትኩረት አቅጣጫ እንደሚሆነም አስረድተዋል።

የግንቦት 20 ድል ፌዴራላዊ ስርዓት እንዲገነባና የሀገሪቱ ህዝቦች በማንነታቸው አንገታቸውን ቀና አድርገው ለሀገራቸው እድገት እንዲረባረቡ እድል መፍጠሩን ነው ፕሬዚዳንት ዶ/ር ሙላቱ የተናገሩት።

የሀገሪቱ ሰላምና እድገት ሊፈጥንም ሆነ ሊዘገይ የሚችለው በኢትዮጵያዊን መሆኑን ያለፉት 27 አመታት አሳይተዋል ብለዋል።

ኢትዮጵያ በብዙ የአፍሪካ ሀገራት ያልታየ ሰላማዊ የስልጣን ሽግግር የፈጸመች መሆኗም በተምሳሌትነት እንድትጠራም አድርጓታል ሲሉም ገልጸዋል።

በትእግሰት ስለሺ

Comments
Loading...