Fana: At a Speed of Life!

የግንቦት 20 በዓል በመቐለ ከተማ በፓናል ውይይት ተከበረ

0 39

አዲስ አበባ፣ ግንቦት 20፣ 2010 (ኤፍ.ቢ.ሲ) የግንቦት 20 የድል በዓል በመቐለ ከተማ በፓናል ውይይት ተከበረ።

የትጥቅ ትግል መነሻ፣ የግንቦት 20 ፍሬዎች፣ ያጋጠሙ ተግዳሮቶችና መፍትሄዎች ላይ ትኩረት ያደረገ ውይይትም በዚህ ወቅት ተካሂዷል።

የህወሃት ስራ አስፈጻሚ ኮሚቴ አባል አቶ ጌታቸው ረዳ ” የግንቦት ሃያ ስኬቶችና ስጋቶች” በሚል ርዕስ የመነሻ ጽሑፍ አቅርበዋል።

በጽሁፋቸውም በዓሉ ህገ መንግስታዊ ዋስትናን በማረጋገጥ ህዝቦች በመፈቃቀድና በእኩልነት የሚስተናገዱባት የብዝሃነት ሃገር እንድትሆን አስችሏል ነው ያሉት አቶ ጌታቸው።

በግንቦት 20 በተገኘው ውጤት የብሄር እኩልነት በህገ መንግስት እንዲከበር ማስቻሉንም ጠቅሰዋል።

ዋናው የህገ መንግስቱ አላማ በታሪክ ያጋጠሙና እኩልነት ላይ ያልተመሰረቱ ግንኙነቶችን በመፍታት ጠንካራ ኢትዮጵያዊ አንድነትን መመስረት ነው ብለዋል።

በ1982 የኢትዮጵያ ጠቅላላ የሃገር ውስጥ ምርት 868 ሚሊየን ዶላር እንደነበር ያነሱት አቶ ጌታቸው፥ ይህም ከአፍሪካ ከመጨረሻዎቹ ሀገራት ተርታ አሰልፏት እንደነበር ጠቁመዋል።

በቅርቡ በተደረገ ጥናት አሁን ላይ ጠቅላላ የሃገር ውስጥ ምርቱ 81 ቢሊየን ዶላር የደረሰ ሲሆን፥ ይህም በአፍሪካ ስድስተኛዋ ሀገር እንድትሆን ማስቻሉንም አንስተዋል።

የተመዘገበው ኢኮኖሚያዊ እድገትም በተቀረጹ ፖሊሲዎች አማካኝነት የመጣ መሆኑንም አስረድተዋል፤ በዓሉም ኢትዮጵያ በፈጣን ኢኮኖሚያዊ እድገት እንድትጓዝ ማስቻሉን በመጥቀስ።

ከዚህ ባለፈም የተቀረጹ ደሃ ተኮር ፖሊሰዎች ለውጥ ለማምጣት አጋዥ መሆናቸውንም ነው የተናገሩት።

የትግራይ ክልል ምክትል ርዕሰ መስተዳድር ዶክተር ደብረጽዮን ገብረሚካኤል በበኩላቸው፥ ግንቦት 20 የአዲስ ስርዓት ማብሰሪያ እና ሁሉንም ብሄር ብሄረሰቦች በእኩልነት የሚያይ ስርዓት መሰረት የተጣለበት ዕለት መሆኑን ተናግረዋል።

ዶክተር ደብረጽዮን 27ኛውን የግንቦት 20 በዓል በማስመልከት ለመላው የኢትዮጵያ ህዝቦች የእንኳን አደረሳችሁ መልዕክትም አስተላልፈዋል።

የብአዴን/ኢህአዴግ መስራች አቶ ህላዌ ዮሴፍ በበኩላቸው፥ የኢትዮጵያ ህዝቦች የብሄር ጭቆና፣ ኢ-ፍትሀዊ የኢኮኖሚ ክፍፍል እና የዴሞክራሲ እጦትን ለማስቀረት ትግል ማካሄዳቸውን ነው የተናገሩት።

በህዝቦች ትግልም ለኢትዮጵያ እኩልነት የሚያበስር ህገመንግስት ከመጽደቁ በፊት በ21 ሺህ ቀበሌዎች ከ17 ሚሊየን ህዝብ በላይ መወያየቱን አንስተዋል።

በዚህም በሀገሪቱ አዲስ ስርዓት መገንባት መቻሉን ጠቅሰው፥ በሂደት ስርዓቱን የሚጻረሩ አካሄዶች በውስጥ ድርጅት መታየታቸውንም ገልጸዋል።

የህወሃት መስራች አቶ ስዩም መስፍን “በጊዜያዊ ጥቅም፣ በግል ስልጣን ፍላጎት፣ በቡድን የመክበር ፍላጎት፣ ከአመራሩ ጀምሮ እስከታች ባለው አባል ትልቁ ፈተና መሆናቸውን ጠቁመዋል።

እነዚህን እንቅፋቶችም መንግስት፣ ድርጅት እና ህዝብ በመተባበር ሊታገሏቸው ይገባል ነው ያሉት።

 

በሙሉጌታ አጽብሃ

Comments
Loading...