Sosochiin ifatti hundeeffamuu Magaalaa Shaggar borurraa eegalee ni gaggeeffama

Finfinnee, Guraandhala 16, 2015 (FBC)- Guyyaa borii irraa eegalee sosochiiwwan ifatti hundeeffamuu Magaalaa Shaggar akka gaggeeffaman Bulchiinsi Magaalichaa beeksise.

Bulchiinsi magaalichaa sagantaa sosochii Magalaa Shaggar ilaalchisee miidiyaaleef ibsa kenneera.

Ibsicha kan kennan Kantiibaan Magaalaa Shaggar Dooktar Tashoomaa Addunyaa, Magaalli Shaggar, magaalaa bal’oo biyyattii ta’uu yaadachiisaniiru.

Magaalattiin qonnaan bultoota giddugaleeffachuun kan hundooftee fi hanga ammaatti hojiilee bal’aan gama dinagdee fi hawaasummaa akkasumas teeknooloojiiwwan diriirsuu hojjetamuu himaniiru.

Guyyaa borii irraa kaasees Magaalaan Shaggar ifatti hojii eegaluu kan mul’isan sirnoonni garaagaraan akka gaggeeffaman Dooktar Taashoomaan ibsaniiru.

Marii Paanaalii dabalatee, fiigichi guddaan Magaalaa Shaggar 1ffaan sirnoota gaggeeffaman keessaa ta’uun himameera.

Dorgommii Fiigichaa guddichaa kiilomeetira 5 Sanbata dhufu gaggeeffamu irrattis kilaboonni 21 fi atileetotni 300 ol galmaa’uu isaanii itti gaafatamaan Biiroo Dargaggootaa fi Ispoortii Magaalaa Shaggar Naasir Huseen ibsaniiru.

Fiigicharratti namoonni dhuunfaa kuma 5 ta’an kan hirmaataan yoo ta’u, argisiisni fardaas ni gaggeeffama jedhameera.

Atileetota dorgommii kana injifataniif badhaasni Birrii kuma 200 qophaa’uunis ibsameera.

Hirphoo Shibootu gabaase

#Ityoophiyaa

Odeeffannoowwan waqtaawaa dabalataa argachuuf;

Teelegraama https://t.me/afanoromofana

Yuutyuubii Afaan Oromo: https://bit.ly/3FjfCXR

Marsariitii fanabc.com/afaanoromoo

Twiitara https://twitter.com/fanatelevision nu duukaa bu’aa

Feesbook:https://www.facebook.com/afaanoromoofana/

Yeroo maraa nu waliin waan taataniif isin galateeffanna.