Somaaliilaandi fi Ameerikaan marii tumsa waloo cimsuu gaggeessan

Finfinnee, Sadaasa 25, 2017 (FBC)-Somaaliilaandi fi Ameerikaan marii tumsa waloo cimsurratti xiyyeeffate gaggeessaniiru.

Jilli Ameerikaatti Ambaasaaddara Somaaliyaa Riichaardi Raayilii fi komaandara Humna Waloo Afrikaa Bahaa meejar Jeneraal Biriyaan Tii Kaashmaaniin durfamu Pireezidaantii haaraa Somaaliilaandii waliin Hargeessaatti mari’ateera.

Marii isaaniin jilli Ameerikaa kun filannoo Pireezidaantummaa Somaaliilaandi gaggeessite dinqisifachuun, Pireezidaantii Haaraa Somaaliilaandi ta’uun kan filataman Abdurrahmaan Mohammad Abdullaahii Iroof ergaa baga gammadanii dabarsaniiru.

Somaaliilaandi nageenya Bahaa Afrikaa mirkaneessuu fi hariiroo Somaaliilaandii fi Ameerikaa gidduu jiru caalmaatti cimsuuf mariin gaggeeffamuun ibsameera.

Abdurrahmaan Mohammad Abdullaahiin gamasaaniin, jila Ameerikaa waliin marii Ardichatti nagaaf tasgabbii mirkaneessuufi Demookiraasii babal’isurratti xiyyeeffate taasisuu gama miidiyaa hawaasummaa isaaniin ibsaniiru.

Mariin kun Ergama Somaaliilaandi fi Ameerikaa kan mirkaneessuu ta’uu ‘Horn Diplomat ‘gabaaseera.