Pir. Shimallis Abdiisaan jila deeggarsaafi hordoffii Federaalaa waliin mari’atan

Finfinnee, Bitootessa 7, 2016 (FBC) – Pireezidaantiin Mootummaa Naannoo Oromiyaa Obbo Shimallis Abdiisaan jila deeggarsaafi hordoffii Federaalaarra gara Naannoo Oromiyaatti bobba’an waliin mari’ataniiru.

Jilli mootummaa Federaalaa Ministira Raayyaa ittisaa Dooktar Abrahaam Balaayiin durfamu Pireezidaantii Mootummaa Naannoo Oromiyaa Obbo Shimallis Abdiisaa fi hoggantoota olaanoo Mootummaa Naannoo Oromiyaa biroo waliin adeemsaafi qabxiilee qorannoo raawwii hojiirratti mari’ateera.

Garee kanaaf karoorri mootummaa naannichaafi raawwiin hojiilee gama misoomaa, tajaajilaafi bulchiinsa gaarii , carraa hojii uumuufi nageenyaa irratti ibsi kennameera.

Jilichi hojiilee misoomaafi fayyadamummaa ummataa mirkaneessuuf akka naannootti hojjetamaa jiranii fi haala waliigalaa lafarra jiru kan daawwatu ta’uu ragaan Waajjira Pireezidaantii Mootummaa Naannoo Oromiyaa irraa argame ni mul’isa.