Muummeen Ministiraa Abiy Ahimad tumsa argisiisanitti ummanni Sudaan gammadeera-Ittaanaa Ministira Dhimma Alaa Sudaan

Finfinnee, Amajjii 27, 2015 (FBC)- Muummeen Ministiraa Abiy Ahimad tumsa argisiisanitti ummanni Sudaan gammadeera jechuun Itti Aanaan Ministira Dhimma Alaa Sudaan Dafaalaa Elhaajii Alii dubbatan.

Ministir Deetaan Ministeera Dhimma Alaa Ambaasaaddar Misgaanuu Argaa Ittaanaa Ministira Dhimma Alaa Sudaan Ambaasaaddar Dafaalaa Elhaajii Alii waliin mari’ataniiru.

Marii isaaniin Ambaasaaddar Misgaanuun hariiroo ummataa fi ummataa Ityoophiyaa fi Sudaan gidduu bara lakkoofsise dinqisiifataniiru.

Daawwannaa Muummeen Ministiraa Abiy Ahimad Sudaanitti taasisuun tumsa gama maraa ummataa fi mootummaa Sudaaniif qaban kan argisiisu ta’uu dubbataniiru.

Mootummoota lameen gidduus waldhabdeewwan jiran mariin furuun ejjennoo mootummaa Ityoophiyaa ta’uu himaniiru.

Sudaan miseensummaa Gamtaa Afrikaarraa ugguramuun Ityoophiyaa kan yaaddessu ta’uu kan ibsan ambaasaaddarichi, gara miseensummaa gamtichaatti akka deebituuf mootummaan Ityoophiyaa tattaaffii akka taasisu akkeekaniiru.

Mootummaan Ityoophiyaa, hariiroo koomishinii waloo ministiroota biyyoota lameenii cimee akka itti fufu, koomishinii daangaa waloo naannawaa Hidha Guddichaa Haaromsa Ityoophiyaa fi IGAD cimsuuf qophii ta’uu ibsaniiru.

Dabalataan daldalaa seeraan alaa fi yakkoota naannawaa daangaatti raawwataman irratti qabsaa’uuf walta’iinsaan hojjechuuf mootummaan Ityoophiyaa murannoo qabaachuu hubachiisaniiru.

Ambaasaaddar Dafaalaa Elhaajii Alii gama isaaniin, Muummeen Ministiraa Abiy Ahimad daawwannaan Kaartumitti taasisanii fi marii garee siyaasaa Sudaan hunda waliin taasisan dinqisiifataniiru.

Rakkoo Sudaan ilaalchisee tumsaa fi ejjennoo Muummeen Ministiraa Abiy Ahimad argisiisan ummata Sudaaniin kan gammachiise ta’uu himuu isaanii ragaan Ministeeraa Dhimma Alaa irraa argame ni mul’isa.

Odeeffannoowwan waqtaawaa dabalataa argachuuf;

Teelegraama https://t.me/afanoromofana

Yuutyuubii Afaan Oromo: https://bit.ly/3FjfCXR

Marsariitii fanabc.com/afaanoromoo

Twiitara https://twitter.com/fanatelevision nu duukaa bu’aa

Feesbook:https://www.facebook.com/afaanoromoofana/

Yeroo maraa nu waliin waan taataniif isin galateeffanna.