Mootummaan haaraan naannoo Oromiyaa Fulbaana 15, 2014 kan hundeeffamu ta’uu himame
Finfinnee, Fulbaana 13, 2014 (FBC) – Mootummaan haaraan naannoo Oromiyaa Fulbaana 15, 2014 kan hundeeffamu ta’uu Af Yaa’iin Caffee Oromiyaa Aadde Loomii Badhoo ibsan.
Af Yaa’iin Caffee Oromiyaa Aadde Loomii Badhoo Yaa’ii Xumuuraa Bara Hojii Caffee 5ffaa fi Yaa’ii Duraa Waggaa 1ffaa Bara Hojii Caffee 6ffaa gaggeeffamu ilaalchisee miidiyaaleef ibsa laataniiru.
Caffeen Bara Hojii 5ffaa Yaa’ii Xumuuraa Fulbaana 15, 2014 Waaree Dura kan gaggeeffamu yeroo ta’u hojiiwwan jalqabe xumuuruu waan qabuuf Wixineewwan Labsii Lama (Gurmaa’ina Caffee fi Qaama Raawwachiiftuu) yeroo dheeraaf qorannoon irratti gaggeeffamaa ture irratti mari’achuun akka mirkaneessu Aadde Loomiin ibsaniiru.
Miseensota Caffee waggoota jahan darbaniif tajaajilaa turaniif sirni gaggeessaa kan taasifamu ta’uus himaniiru.
Yaa’iin Duraa Waggaa 1ffaa Bara Hojii Caffee 6ffaa Caffee Haaraa Fulbaana 15, 2014 Waaree Booda gaggeeffamu irratti Moggaasni Mootummaa (Caffee, qaama seera raawwachiiftuu fi seera hiiktuu) akkasumas muudamoonni biroo walduraa duubaan kan raawwataman ta’uu adde Loomiin miidiyaaleef ibsaniiru.
Yaa’iin Caffee lamaan wal duraa duubaan gaggeeffamu kunis miseensota Caffichaatiif bu’uura waamichi taasifameen argamanii mariirra kan jiranii fi miseensonni haaraanis Yaa’iin duratti hojimaata Caffee irratti ibsi gabaabaan dursee kan kennamuuf ta’uu Aadde Loomiin ibsuu ragaan Waajjira Caffee Oromiyaarraa argame ni muul’isa.
Fuula Feesbuukii keenyan dabalata odeeffannoo waqtaawaa argachuuf;
Teelegraama https://t.me/afanoromofana
Marsariitii fanabc.com/afaanoromoo
Twiitara https://twitter.com/fanatelevision nu duukaa bu’aa
Yeroo maraa nu waliin waan taataniif isin galateeffanna.