Ityoophiyaatti qabiyyeen imaammata tajaajila tola ooltummaa qophaa’aa jira jedhame

Itti Aanaan Daayrektaraa Abbaa Taayitichaa Faasikaa Mollaa, tajaajilli tola ooltummaa faayidaa biyyaalessaa qabaatee akka itti fufuuf hojiileen garagara gaggeeffamaa jiraachuu himaniiru.

Kanaaf ammo qabiyyeen immaammata tajaajilichaa qophaa’aa jiraachuu fi tajaajilli tola ooltummaa, dameewwan dinagdee, hawaasummaa fi siyaasaa irratti hanqinaalee mul’atan guutuu keessatti gumaachaa jiraachuu ibsaniiru.

Qabiyyeen imaammatichaa, dhaabbileen mootummaa fi waldaalee siivilii hojii tajaajila tola ooltummaarratti bobba’an kan ittiin hoogganaman, tajaajila tola ooltummaa ijaarsa sirna diimookiraasiif, guddina hawaas-dinagdeef, ijaarsa nageenyaaf akkasumas faayidaa biyyaalessaaf qabu sirnaan akka bahatu gochuuf barbaachisaa ta’uu hubachiisaniiru.

Seeronni sochii dhaabbilee siivilii daangessan fooyya’uu hordofee, dhaabbileen siivilii biyya keessaa fi alaa hedduun sochii tajaajila tola ooltummaa gaggeessaa jiraachuu eeraniiru.

Waggoottan sadan darbanittis dhaabbilee waldaalee siivilii biyya keessaa kumni lama galmaa’uu kan ibsan daayrektarichi, kanaan dura dhaabbileen siivilii biyya keessaa fi alaa kuma 1 fi 800 akka turan yaadachiisaniiru.

Yeroo ammaa dhaabbileen kuma 3 fi 800 sadarkaa federaalaatti beekkamtiin kennameefii hojiirra kan jiran ta’uu himaniiru.

Maddi :-TOI

Fuula Feesbuukii keenyaan dabalataa odeeffannoo waqtaawaa argachuuf;

Teelegraama https://t.me/afanoromofana

Yuutiyuubii Afaan Oromo: https://bit.ly/3FjfCXR

Marsariitii fanabc.com/afaanoromoo

Twiitara https://twitter.com/fanatelevision nu duukaa bu’aa

Yeroo maraa nu waliin waan taataniif isin galateeffanna.