Ityoophiyaan Konfiransii Ministiroota Faayinaansii Farra Shororkeessummaa 3ffaarratti hirmaachaa jirti

Finfinnee, Sadaasa 10, 2015(FBC)- Ityoophiyaan Konfiransii Ministiroota Faayinaansii Farra Shororkeessummaa 3ffaarratti hirmaachaa jiraachuu ibsame.

Jilli Ministira Ministeera Nageenyaa obbo Binnaalf Andu’aalamiin durfamu Konfiransii Ministiroota Faayinaansii Farra Shororkeessummaa 3ffaa Hindi magaalaa Niwu Deeliitti gaggeeffamaa jirurratti hirmaachaa jiraachuu eerameera.

Konfiransichi mata duree “ Maallaqni Shororkeessummaaf Oolu Hin Jiru” jedhuun guyyaa har’aarraa eegalee guyyoota lamaaf kan gaggeeffamu ta’uu ibsameera.

Obbo Binnaalf Andu’aalam haasawaa konfiransicharratti taasisaniin, Mootummaan Ityoophiyaa shororkeessummaafi garee shororkeessitootaa idil addunyaarratti duuluun nageenya biyyattii eegsisuuf hojjechaa jiraachuu eeraniiru.

Gochoota shororkeessummaa idil addunyaafi sadarkaa biyyaatti uumaman ittisuuf akkasumas bittaafi gurgurtaa faayinaansii seeraan alaafi daddabarsa maallaqaa ittisuuf dhaabbileen mootummaafi giddugaloonni odeeffannoo faayinaansii gahee olaanaa qabaachuu addeessaniiru.

Shororkeessummaan yaaddoo idil addunyaa ta’uu hubachuun sirna dhaabbilee cimsuun barbaachisaa ta’uu eeruun, Ityoophiyaan shororkeessummaa maallaqaan deeggaramu ittisuuf kutannoo qabaachuu ibsuusaanii ragaan Ministeera Nageenyaarraa argame ni mul’isa.

Odeeffannoowwan waqtaawaa dabalataa argachuuf;

Teelegraama https://t.me/afanoromofana

Yuutyuubii Afaan Oromo: https://bit.ly/3FjfCXR

Marsariitii fanabc.com/afaanoromoo

Twiitara https://twitter.com/fanatelevision nu duukaa bu’aa

Feesbook:https://www.facebook.com/afaanoromoofana/

Yeroo maraa nu waliin waan taataniif isin galateeffanna.