Guyyaan Sabaaf sablammootaa 19ffaan haala kutaalee hawaasaa hunda hirmaachiseen kabajama jedhame

Finfinnee, Sadaasa 3, 2017 (FBC) – Guyyaan Sabaaf sablammootaa 19ffaan haala kutaalee hawaasaa hunda hirmaachiseen Magaalaa Aarbaa Mincitti kan kabajamu ta’uu Manni Maree Federeeshinii beeksise.

Sagantaan cufiinsa kabaja ayyaanichaa Naannoo Kibba Itiyoophiyaa magaalaa Aarbaa Mincitti kan gaggeeffamu ta’uu Manni Maree Federeeshinii ibsa kenneen himeera.

Haaluma kanaan Sadaasni 25 guyyaa Obbolummaa, Sadaasni 26 guyyaa walummaa, Sadaasni 27 Guyyaa Kibba Itiyoophiyaa, Sadaasni 28 Guyyaa marii, akkasumas Sadaasni 29 Guyyaa Itiyoophiyaa jedhamuun moggaafamee sagantaalee adda addaan kan kabajamu ta’uu himeera.

Kaayyoon ayyaanichaa olaanaan tokkummaa sabdaneessaa caalmaatti gabbisuuf ta’uu Qindeessituun ayyaanichaa Aadde Baanchiyirgaa Mallasaan ibsaniiru.

Guyyaan Sabaaf Sablammoota Itiyoophiyaa 19ffaan mata duree ‘waliigaltee biyyaalessaa, Tokkummaa Sabdaneessaaf’ jedhuun kabajama.

Zufaan Kaasahuunii fi Wandimmuu Addunyaatu gabaase.

#Oromia #Ethiopia