Godina Arsii Lixaa Aanaa Shaashamanneetti shakkamtoonni Taaworii humna ibsaa hatan hidhaan adabaman

Finfinnee, Onkololeessa 19, 2014 (FBC)-Godina Arsii Lixaa Aanaa Shaashamannee ganda Majaa Dammaatti shakkamtoonni Taaworii humna ibsaa irraa sibilaa hiikuun hatan hidhaan adabamaniiru.

Himatamtoonni sibiila taaworii hatuun himataman eeruu ummataa fi hordoffii poolisiif caasaa nageenyaatiin shakkamtoonni saddeet too’atamuun himannaan irratti banamuu Itti Gaafatamaan Divizhinii Qorannoo Yakkaa fi Murtii Haqaa Kennisiisaa Waajjira Poolisii Aanaa Shaashamannee Inispeektar Antenaa Ingidaa FBC tti himanii jiru.

Manni Murtii Olaanaa Godina Arsii Lixaa dhaddacha guyyaa har’aa ooleen himatamaa 1ffaa Abdurahmaan Waliyyii fi himatamaa 2ffaa Abdallaa Adaam jedhaman hidhaa cimaa waggaa 9’n akka adabamaniif murtoo dabarseera.

Shakkamtoonni 6 beellamni yeroo biraa qabameefii kan murtii eeggachaa jiran ta’uu Inispeektar Antenaa Ingidaa ibsaniiru.

Hawaasni qabeenya waliinii haala qindoomina qabuun eeggaachuu akka qabuu fi saamtota qabeenyaa ummaata saaman poolisii fi caasaa nageenyaatiif eeruu laachuu akka qabus hubachiisan.

Lammaa Tasfayeetu gabaasee

Fuula Feesbuukii keenyan dabalata odeeffannoo waqtaawaa argachuuf;

Teelegraama https://t.me/afanoromofana

Yuutyuubiihttps://www.youtube.com/c/fanabroadcastingcorporate/

Marsariitii fanabc.com/afaanoromoo

Twiitara https://twitter.com/fanatelevision nu duukaa bu’aa

Yeroo maraa nu waliin waan taataniif isin galateeffanna.