Bishooftuu Magaalaa Ismaartii taasisuuf waliigalteen mallatteeffame

Finfinnee, Sadaasa 2, 2017 (FBC)-Magaalaa Bishooftuutti Pirojektii Ismaarti Siitii jalqabsiisuuf waliigalteen Bulchiinsa Magaalattii fi Itiyoo Teelekoom gidduutti mallatteeffameera.

Bu’uura waliigaltichaan, Itiyoo Teelekoom bu’uuraalee misooma kominikeeshinii fi Odeeffannoo dhiyeessuun Pirojektii Ismaarti Siitii Bishooftuu waliin qindeessuun kan hojjetamu ta’uun ibsameera.

Kantiibaan Bulchiinsa Magaalaa Bishooftuu Obbo Alamaayyoo Asaffaa fi Hoji Raawwachiistuu Olaantuun Itiyoo Teelekoom Firehiiwot Taammiruun mallatteessaniiru.

Pirojektiin Ismaarti Siitii hojiirra ooluun magaalattii ammayyeessuuf karaalee hedduun kan gargaaru ta’uutti dabalataan, miidhagina magaalattii kan dabaluu ta’uu kaasaniiru.

Magaalota Ismaarti Siitiin naannawaa jireenyaaf mijataa uumuuf kan kaayyeefate ta’uu Firehiiwot Taammiruun dubbataniiru.

Waliigaltichaan hojiileen 11 kan gaggeeffaman ta’uu eeruun, magalattiitti tajaajilli neetiwoorkii dhaloota 5ffaa hojiirra ooluun ammoo pirojekticha kan tumsu ta’uu himaniiru.

Karoora Dijiitaal Itiyoophiyaa dhugoomsuuf hojiileen magaalotatti hojjetamaa jiran damee hedduun karooricha kan tumsan ta’uu ibsaniiru.

Fatiyaa Abdaallaatu gabaase.

#Oromia #Ethiopia