Finfinnee, Muddee 9, 2013 (FBC)- Biiroon Qonnaa fi Qabeenyaa Uumamaa naannoo Oromiyaa waggoottaan lamaan darbani as damee qonnaa ammayyeessuu fi gurmaa’insoota bu’aa fooyyee galmeessisan 560 badhaasaa fi beekamtii akka laatuu beeksise.
Hogganaan Biiricha obbo Dhaabaa Dabalee miidiyaaleef har’a ibsa laataniin, qonnan bultoonnii fi horsisee bultoonni kilaasteraan omishaan, waldaan gurmaa’uun hojii misooma jallisii, furdisa beeyladaa fi kunuunsa qabeenya uumamaa akkasumas, hojjettoota dirree misoomaa, qaamoleen qorannoo fi qo’annoon tumsa taasisanii fi waldaaleen bu’uuraafi yuuniyeenoota raawwii fooyyee qabaniif beekamtiifi badhaasa garagaraaa ni argatu jedhaniiru.
Sagantaan badhaasicha torbee boruu ni gaggeeffama jedhaniiru.
Obbo Dhaabaan guyyaa boruurraa eegalee qonnaan bultoonnii fi horsisee bultoonni magaalaa Finfinnee dabalatee magaaloota Oromiyaa 258 keessaa jiran oomisha isaanii baazaarii fi agarsiisaaf ni dhiyeefatu jedhaniru.
Kanaanis carraa gabaa uumuun kan oomishee fi bitatu walitti fiduufi oomishaalee gabaa biyya keessaa fi alaaf barbaadamanillee beeksifachuuf ga’ee olaanaa qaba jedhaniiru.
Dabalataniis aadaa qusannaa guddisuuf qonnan bulaafi horsisee bulaan akkasumas waldaaleen hojiiwwan damee qonna irratti bobba’uun bu’a qabeessa ta’an kan argataniirraa, dhibbeenta 60 akka qusataniif dhaabbilee faayinaasii waliin hojjetamaa jiras jedhaniiru.
Raggaasaa Firoomsaatu gabaase.