Finfinnee, Eebla 24, 2015 (FBC) –Naannoo Oromiyaatti Qonnaa Arfaasaan bara kanaan hanga ammaatti lafti hektaarri miiliyoonni 1.14 sanyiin uwwifamuu Biiroo Qonnaa naannichaa beeksise.
Qonna Arfaasaa bara kanaa haala mijataa uumameen karoora qabame milkeessuuf hojjetamaa kan jiru ta’uu Itti aanaa Hogganaan Biirichaa Obbo Bariisoo Fayisaan ibsaniiru.
Qonna Arfaasaa bara kanaan hanga ammaatti lafa hektaara miiliyoona 1.12 misoomsuuf karoorfame keessaa lafa heektaara miiliyoona 1.17 qopheessuun lafti heektaara miiliyoona 1.14 kan faca’e ta’uu ibsaniiru.
Misooma Qonna Arfaasaatiin qonnaan bulaafi horsiisee bulaan oomishaafi oomishtummaan isaa akka dabalu callaa guddistuun yeroodhaan akka dhiyaatu taasifamaa jiraachuu Obbo Bariisoon himaniiru.
Bara kana Naannoo Oromiyaatti xaa’oo kuntaala miiliyoona 9.2 dhiyeessuuf karoorfame keessaa hanga ammaatti xaa’oon kuntaalli mil 3.8 qonnaan bulaafi horsiisee bulaaf raabsamuu kaasaniiru.
Qonnaan bulaafi horsiisee bulaan misooma qonnaa kamuu kilaasteraan misoomsuu aadaa godhachuun oomishaafi oomishtummaan isaa akka dabalu hojjetamaa jiraachuu dubbataniiru.
Bara kana lafa qonna misoomaa jiru keessaa 90% ol kilaasteraan misoomaa jiraachuu eeruu ragaan BKO irraa argame ni mul’isa.
#Oromiyaa #Ityoophiyaa
Odeeffannoowwan waqtaawaa dabalataa argachuuf;
Teelegraama https://t.me/afanoromofana
Yuutyuubii Afaan Oromo: https://bit.ly/3FjfCXR
Marsariitii fanabc.com/afaanoromoo
Twiitara https://twitter.com/fanatelevision nu duukaa bu’aa
Feesbook:https://www.facebook.com/afaanoromoofana/
Yeroo maraa nu waliin waan taataniif isin galateeffanna.