Finfinnee, Fulbaana 22, 2014 (FBC) – Preezdaantiin Naannoo Oromiyaa Obbo Shimallis Abdiisan hirmaattoota kabaja ayyaana Irreechaa galateeffataniiru.
Obbo Shimallis Ayyaanni Irreechaa Hora Finfinnee bara 2014 karaa duudhaa obbolummaa fi guddummaa ummata Oromoo agarsiisuun kabajamee nagaan xumuramuu isaaf hirmaattootaa fi qooda fudhattoota hunda galateeffataniiru.
Guutuun ergaa galateeffannaa isaanii haala armaan gadiitiin dhiyaateera.
Ayyaanni Irreechaa Hora Finfinnee bara 2014 karaa duudhaa obbolummaa fi guddummaa ummata Oromoo agarsiisuun kabajamee nagaan xumuramuu isaatiin Waaqaaf galata galchaa gammachuu natti dhagahame ibsuun fedha.
Irreechi mallattoo nageenyaa, araaraafi dhiifamaa, tokkummaaf jaalalaa ta’uu ummanni Oromoo akkuma kaleessaa har’as mirkaneessee jira. Ayyaanni kun miidhagaafi hawwataa ta’ee karaa duudhaasaa eeggateen akka kabajamu qaamolee gumaacha taasisaan galateeffachuun fedha.
Hundaa ol abbaa dhimmaa kan ta’e ummaanni Oromoo bal’aan ayyaanni kun karaa duudhaa safuufi safeffannaa akkasumas duudhaa obbolummaa sabaaf sablammoota gidduutti dagaagsuu danda’uun akka kabajamu taasisuu keessaniin ulfaadhaa; galatoomaa jechuun barbaada.
Itti aansuun Abbootii Gadaafi Haadholii Siinqee Aadaa Oromoo tiksitanii asiin geessan, har’as akkuma kaleessaa ummata Oromoo tokkummaan hiriirsitanii Irreechi Hora Finfinnee akka milkiin xumuramu taasistan galanni keessan guddaadha.
Qeerroofi qarreen uffata aadaa Oromoon faayamtanii ayyaanicha miidhagsitan nageenya dhuunfaafi waloo keessanii tiksuun Irreecha Hora Finfinnee milkeessitan, Foollee Oromoo ijaarsa cimaadhaan itti gaafatamummaa Oromummaa keessan baatan, jaarattoota magaalaa Finfinnee miira obbolummaan irreeffattoota jaalalaan keessummeessitan, sabaaf sablammoonni biyya keenyaa ayyaana kanarratti hirmaachuun kabaja ummata Oromoof qabdan agarsiiftan, hoggansi sadarkaa sadarkaan jirtaniifi caasaaleen nageenyaa(Poolisii Federaa, Oromiyaa, Magaala Finfinneefi Tika Biyyaalessaa) qorraafi aduu dandamatanii, dadhabbiifi nuffii tokko malee ayyaanni kun akka milkaa’u taasistan, aantummaa ummattummaa qabatamaan agarsiiftan galataaf ulfinatu isinii mala. Akkasumas Miidiyaaleen biyya keessaafi alaa ayyaana miidhagaa kana gurraafi ija addunyaan geessan hojii boonsaa hojjetaniif maqaa koofi Mootummaa Naannoo Oromiyaan galata isiniif dhiyessuun fedha.
Dhumarratti Irreechi Hora Har-Sadee Fulbaana 23/2014 akkuma Hora Finfinnee karaa duudhaasaa eeggateen akka kabajamu waamichaa kiyya dhiyessa.
Horaa Bulaa Deebannaa!
Obbo Shimallis Abdiisaa, PBMNO
Fuula Feesbuukii keenyan dabalata odeeffannoo waqtaawaa argachuuf;
Teelegraama https://t.me/afanoromofana
Yuutyuubii https://www.youtube.com/c/fanabroadcastingcorporate/
Marsariitii fanabc.com/afaanoromoo
Twiitara https://twitter.com/fanatelevision nu duukaa bu’aa
Yeroo maraa nu waliin waan taataniif isin galateeffanna.