Finfinnee, Sadaasa 14, 2013 (FBC) – Michuun Donaald Tiraamp beekamaan filannoodhaan mo’amuu isaanii fudhachuu diduufi bu’aa filannoo boodatti deebisuuf isa yaalan akka dhaaban gorsan.
Bulchaan Niiw Jeersii duraanii Kiriis Kiriistii garee seeraa pirezidaantichaa ‘qaanii biyyaalessaa’ jedhanii waaman.
Preezdanti Tiraamp bu’aa filannoo fudhachuu diduun, filannoon akka hatame ragaa malee himachaa jiru.
Rippaablikaanoti baayyeen adeemsa seeraa isaanii deeggaranillee muraasni garuu bu’aa filannoo akka fudhatan gaafachaa jiru.
Gaafa Sanbataa Peensilvaaniyaatti abbaan murtii himannaa isaanii sagaleen karaa poostaa kenname sirrii miti jedhu jalaa kuffisaniiru.
Abbaan murtii Maatiiw Biraan falmii seeraa ragaan hin deeggaramneetu dhiyaatee ture jedhan.
Sana booda inumaayyuu, filatamaan warra Demookiraatii Joo Baayidan Pensilvaaniyaatti sagalee 80,000 akka dursan mirkanaa’e.
Haa tahu malee gareen duulaa Donaald Tiraamp ol iyyachuuf jiru.
Baayidan Tiraampiin sagalee 306 fi 232 mo’ataniiru. Kunimmoo sagalee lakkoofsa mo’achuuf barbaachisu 270 irra baayyee kan caalu dha.
Miidiyaa ABC jedhamurratti Sambattan darbe ’’dhugaa dubbachuuf gareen seeraa preezdantichaa qaanii biyyaalessaa tahaa jiru,’’ jedhan.
Deeggartoonni Tiraamp ‘’alatti waa’ee filannoon hatamuu haasa’u, garuu yeroo dhaddachatti dhiyaatan waa’ee hannaa hin falman,” jedhan.
“Ani deeggaraa preezdantichaan ture. Isas filadheera garuu filannoon hundi bu’aa qaba, waan tahee jiru akka hin taanetti yaaduun itti fufuu hin dandeenyu,’’ jedhan.
Bara Faranjoota 2016tti bulchitoota kaadhimummaa Tiraamp deeggaran keessaa isaan jalqabaa turan.
Kana malees falmii preezdantichi Baayidan waliin yeroo jalqabaaf taasisaniifis kan qopheessan nama kana.
Abbaa seeraa garee Tiraamp kan bakka bu’an Sidnii Paaweel ibsa gaafa Kamisaa kennaniin ragaa tokkoyyuu otoo hin dhiyeessiin sirni filannoo elektiroonikii sagalee baayyee kan Baayidanitti geeddareera, kan mo’achuu danda’es ‘maallaqa koministiini’ jedhan.
Gareen duulaa Tiraamp gaafa Sanbataa ibsa baaseen “aadde Sidnii Paaweel adeemsa seeraa kana kan gochaa jirtu karaa ofii isheetiin malee unuun bakka buutee miti” jedhan.
Haata’uuti, jalqaba baatii kanaarratti miseensa garee kanaa akka taate Tiraamp Tiwuutarii isaaniirratti barreessanii turan.
Dilbatarras Rippaablikaanoti biroo bu’aa filannoo kanaa akka fudhatan gorsaa turan.
Bulchaan kutaa biyyaa Meeriilaand Laarii Hogaan yaaliin bu’aa filannoo duubatti deebisuuf taasifamu,’’biyya keenya biyya boodatti haftuu faakkeessuufi,’’ jedhan.
Tiwuutarii irrattis, ‘’Tiraamp goolfii haasa’uu dhiisanii bu’aa filannoo kanaa fudhachuu qabu,’’ jedhaniiru.
Bakka bu’aan naannoo Mishigaan Fireed Aptan sagalee kennitoonni naannoo isaanii Baayidan filachuun filannoo isaanii agarsiisaniiru jedhan.
Preezdantichi bu’aa filannoo hin fudhatiiniif malee yeroon sirna aangoo wal-harkaa fuudhuu amm jalqaba ture jedhan.
Maddi:- BBC
Odeeffannoo waqtaawaa argachuuf Teelegraama keenya https://t.me/afanoromofana subiskiraayib godhaa.
Karaa Yuutyuubii keenyan nu hordofuuf FBC Afaan Oromoo
https://www.youtube.com/channel/UCsy_Mc1C45kRUVopA-NK10A subiskiraayib godhaa.
Karaa marsariitii (weebsaayitii) keenya fanabc.com/afaanoromoo nu hordofaa