Finfinnee, Fulbaana 24, 2015 (FBC) – Godina Jimmaatti misooma jallisiif marsaa jalqabaan Paampiin bishaanii 850 qonnaan bultootaaf raabsameera.
Paampiiwwan kunneen Birrii miiliyoona 35 oliin kan bitaman yoo ta’u, sochii qonna ammayyeessuuf taasifamu tumsuuf qooda qaba jedhame.
Itti gaafatamaan Waajjira qonnaa fi misooma qabeenya uumamaa godinichaa Obbo Mahammad Xahaa Abbaa Fiixaan, bara kana jallisiidhaan lafti hektaara kuma dhibba 1 fi kuma 40 misoomsuuf sochiin eegalamuu eeraniiru.
Bulchaan godina Jimmaa Obbo Tijjaanii Naasir gama isaaniitiin, Paampiiwwan bishaanii kunneen, oomishaa fi omishtummaa dabaluuf ga’ee qabaachuu himaniiru.
Yeroo itti aanuus Paampiiwwan dabalataa qonnan bultootaaf kan raabsaman ta’uu dubbataniiru.
Muktaar Xahaatu gabaase.