Finfinnee, Onkololeessa 4, 2015 (FBC) – Fooramiin Misoomaa Horsiise Bultootaa Ityoophiyaa guyyaa har’aa hundeeffamuu ibsame.
Kaayyoon hundeeffama fooramichaa oomishaafi oomishtummaa horsiise bultootaafi gariin horsiise bultootaa guddisuun guddina diinagdee biyyaaf ga’ee isarraa eegamu akka ba’atuuf ta’uu ibsameera.
Kana malees bu’uuraalee misoomaa babal’isuun, tajaajila faayinaansii hirmaachisaa ta’e cimsuun, imaammataafi hojiimaatilee seeraa fooyyessuun haala jiruufi jireenya horsiise bultootaafi gariin horsiise bultootaa guddisuuf ta’uu eerameera.
Ministirri Ministeera Qonnaa obbo Umar Huseen, Ministeerichi qabeenya misooma beelladaa haalaan itti fayyadamuun akka danda’amutti karoora Qonnaa waggaa 10niin xiyyeeffannoo kennee hojjechaa jiraachuu dubbataniiru.
Oomishtummaa qabeenya beelladaa bu’aa qabeessa taasisuuf Komishiniin Hojiilee Gamtaa Ityoophiyaa dhiyeessii faayinaansiif haala mijeessuuniifi hawaasa qindeessuun hojiirra oolmaa fooramichaaf gahee isaa ba’achuu akka qabu yaadachiisaniiru.
Ministirri Ministeera Jallisiifi Naannawaa Gammoojjii Injinar Ayishaa Mahaammad gamasaaniin, naannawaa horsiise bultootaa qabeenyi beelladaa guddaan waan jiruuf qabeenya kana bifa saayinsawaa ta’een qaamolee deeggartootaa hunda qindeessuun itti fayyadamuun yoo danda’ame oomishtummaa sadarkaa biyyaatti qabame milkeessuun ni danda’ama jedhaniiru.
Fooramichi horsiise bultoota naannolee Oromiyaa, Afaar, Somaalee, Kibba Lixaa Ityoophiyaa, Kibbaa, Gaambeellaafi Beenishaangul Gumuz kan of keessatti hammatu ta’uu ragaan Ministeera Qonnaarraa argame ni mul’isa.
Odeeffannoowwan waqtaawaa dabalataa argachuuf;
Teelegraama https://t.me/afanoromofana
Yuutyuubii Afaan Oromo: https://bit.ly/3FjfCXR
Marsariitii fanabc.com/afaanoromoo
Twiitara https://twitter.com/fanatelevision nu duukaa bu’aa
Feesbook:https://www.facebook.com/afaanoromoofana/
Yeroo maraa nu waliin waan taataniif isin galateeffanna.