Finfinnee,Mudde 9, 2017 (FMC) – Finfinneetti dhaabbileen Daldalaa hanga halkan sa’aatii 3:30tti tajaajila kennuu eegaluu Biiroon Daldalaa Magaalaa Finfinnee beeksiise.
Yeroon tajaajilaa dhaabbilee kanneenii dheerachuu ilaachisee hoggantuun Biiroo Daldalaa Magaalaa Finfinnee Aadde Habiibaa Siraaj miidiyaaleef ibsa kennaniiru.
Haala mijataa jirutti fayyadamuun dhaabbileen Daldalaa magaalichaa hanga halkan sa’aatii 3:30tti tajaajila akka kennan Kaabineen Bulchiinsa Magaalaa Finfinnee murteessuu himaniiru.
Guyyaa murtoon darbee eegalee murtichi hojiirra ooluu kaasaniiru.
Kunis diinagdee magaalichaa si’eessuun hawaasa daldalaa caalmaatti fayyadamoo kan taasiisu ta’uu dubbataniiru.
Tajaajilli Geejjiba Mootummaa fi dhaabbilee dhuunfaas hanga halkan sa’aatii 4:00 tajaajila akka kennan taasiifamuu himaniiru.
Baatiwwan shanan darban keessaa daldaltoonni kumni 47 ol eeyyama daldalaa haaraa fudhachuu isaanii Aadde Habiibaan ibsaniiru.
Dhaabbileen eeyyama isaanii hin haaromsine ammoo saffisaan akka haaromsan hubachiisaniiru.