Finfinnee, Adoolessa 11, 2014(FBC)- Dorgommii Shaampiyoonaa Atileetiksii Addunyaa 18ffaa Ameerikaa Ooriiganitti gaggeeffamaa jiruun guyyaa har’a Atileetonni Ityoophiyaa dorgommiiwwan 3 irratti kan hirmaatan ta’uu ibsame.
Haaluma kanaan waaree booda sa’aatii 10:15 irratti dorgommiin maraatoonii dubartootaa gidduutti kan gaggeeffamu yoo ta’u, Atileet Gooyitiitoom Gabrasillaasee, Abaabal Yeshaanahi fi Ashaatee Bakariin dorgommicharratti ni hirmaatu.
Dorgommiin xumuraa fiigicha gufachiisaa meetira kuma 3 dhiirota gidduutti halkan gara barii gasa’aatii 11:20 kan gaggeeffamu yoo ta’u, Atileet Hayilamaariyaam Amaaree, Geetinnat Waalee fi Lammeechaa Girmaa Ityoophiyaa bakka bu’uun ni hirmaatu.
Dabalataan dorgommii meetira kuma 1 fi 500 dubartoota gidduutti dorgomamuun Atileet Hiruut Mashashaa, Gudaaf Tsaggaayee fi Fireewayinii Hayiluu kan hirmaatan ta’uu eerameera.
Gama biraan, dorgommii fiigichaa meetira kuma 1 fi 500 dhiirotaa kaleessa galgala gaggeeffameen Atileet Taaddasaa Lammiin ramaddicharraa 2ffaa ba’uun yoo xumuru, Atileet Saamu’eel Tafarraa ramaddiisaarraa 9ffaa ba’uun osoo hin darbiin hafuu ragaan Federeeshinii Atileetiksii Ityoophiyaarraa argame ni mul’isa.
Odeeffannoowwan waqtaawaa dabalataa argachuuf;
Teelegraama https://t.me/afanoromofana
Yuutyuubii Afaan Oromo: https://bit.ly/3FjfCXR
Marsariitii fanabc.com/afaanoromoo
Twiitara https://twitter.com/fanatelevision nu duukaa bu’aa
Feesbook:https://www.facebook.com/afaanoromoofana/
Yeroo maraa nu waliin waan taataniif isin galateeffanna.