Ayyaanni Cuuphaa mallattoo qulqullummaafi dhiifamaa ta’ee waggaa waggaan yaadatama-Aadde 𝐒𝐚’𝐚𝐚𝐝𝐚𝐚 𝐀𝐛𝐝𝐮𝐫𝐚𝐡𝐦𝐚𝐚𝐧

Finfinnee, Amajjii 10, 2015(FBC)- Afyaa’iin Caffee Oromiyaa Aadde 𝐒𝐚’𝐚𝐚𝐝𝐚𝐚 𝐀𝐛𝐝𝐮𝐫𝐚𝐡𝐦𝐚𝐚𝐧 Ayyaana Kataraafi Cuuphaa sababeeffachuun ergaa baga ittiin isin gahee dabarsaniiru.

Ayyaanni Cuuphaa hordoftoota amantaa kiristaanaa biratti Kiristoos Laga Yoordaanusitti guyyaa itti cuuphame yaadachuuf kan kabajamu ta’uu eeruun, mallattoo qulqullummaafi dhiifamaa ta’ee waggaa waggaan yaadatama jedhan.

Guutuun ergaa isaanii akka armaan gadiitti dhiyaateera.

Kabajamtoonni Hordoftoota Amantaa Kiristaanaa, Baga Ayyaana Cuuphaa Bara 2015 Nagaan Geessan. Ayyaanni Cuuphaa, hordoftoota amantaa Kiristaanaa biratti Kiristoos Laga Yoordaanusitti guyyaa itti cuuphame yaadachuuf ayyaana kabajamu yommuu ta’u, mallattoo qulqullummaafi dhiifamaa ta’ee waggaa waggaan yaadatama.

Ayyaana kana irratti, ummanni heddumminaan bahee wayita waliin kabaju duudhaalee waldanda’uu qabnu cimsuun, hariiroo waliin jireenyaa tokkummaa keenyaan jabeessaa, aadaan wal bira dhaabbachuu, harka qalleeyyii deeggaruufi waliif birmachuu qabnus duudhaa keenya ganamaafi qabeenya guddaa rakkoo ummata keenyaa ittiin hiiknudha. Kanaaf, lammiilee keenya yeroo ammaa sababa hongeen deeggarsa barbaadan cinaa dhaabbachuun aantummaa qabnuuf akkuma kaleessaa qabatamaan agarsiisuu qabna.

Ummanni keenya, mootummaa isaa cinaa dhaabbatee hojiiwwan misoomaafi galmoota gurguddoo imala keenya dhugoomsan qabannee hojjechaa jirru milkeessuu keessatti kaleessa qooda olaanaa fudhachuun bahachaa tureera. Har’as, hojiiwwan hojjennu hunda keessatti tumsi ummata keenyaa murteessaadha. Kanaaf, hirmaannaa gama kanaan qabnu cimsaa, nageenya qe’eefi naannoo keenyaa mirkaneessuu keessattis qooda keenya adda durummaan bahachuu akka qabnun dhaama.

Caffeen Oromiyaas, qaama sagalee ummataan hundaa’eefi bakka bu’ummaa ummataa fudhatee hojjechaa jiru waan ta’eef, itti gaafatamummaa dachaa akka qaama mootummaattis ta’e, akka bakka bu‘aa ummataatti qabu bahachuun aantummaa ummata isaaf qabu yeroo kamiyyuu caalaa kan mirkaneessu ta’uun ibsa.

Dhumarrattis, hojiiwwaniifi galmoota gurguddoo qabannee hojjechaa jirru hirmaannaa ummata keenya bal’aan deeggarree injifannoowwan kaleessa galmeessine, hojii keenya boruuf galtee guddaa godhannee, guddina biyyaafi naannoo keenyaa saffisiisuu akka qabnu carraa kanaan dhaamsakoo dabarsa. Ayyaanni kun kan milkii, gammachuufi jaalalaa akka isiniif ta’uu hawwiin qabu ibsaa, irra deebi’uun Baga Ayyaana Cuuphaa bara 2015n isin gahen jedha.

Odeeffannoowwan waqtaawaa dabalataa argachuuf;

Teelegraama https://t.me/afanoromofana

Yuutyuubii Afaan Oromo: https://bit.ly/3FjfCXR

Marsariitii fanabc.com/afaanoromoo

Twiitara https://twitter.com/fanatelevision nu duukaa bu’aa

Feesbook:https://www.facebook.com/afaanoromoofana/

Yeroo maraa nu waliin waan taataniif isin galateeffanna.