Piriimeer Liigii Ingilaandiin taphni Liiverpuul morkataa isaa Maanchiister Siitii keessummeessu hawwiin eegama

Finfinnee, Sadaasa 20, 2017 (FBC) – Taphoonni Piriimeer Liigii Ingilaandi torbee 13ffaan har’aa eegaluun taphatamu.

Sagantaan torbee 13ffaa kun tapha har’a halkan sa’aatii 5:00 eegalee Biraayitan – Saawuuz Hampitan keessummeessuun eegalama.

Boru waaree boodaa sa’aatii 12:00 eegalee taphoonni 4 kan taphataman yoo ta’uu,Bireentifoord – Leesister Siitii, Kiristaal Paalaas – Niwuukaasiil, Nootiingihaam Forest – Ipisiwiich Taawoon waliin yoo morkatan, Woolviis ammoo Boornimaawuuz waliin falmata.

Akkasumas taphni galgala sa’aatii 2:30 eegalee Weest Haam Arsenaal keessummeessu ni eegama.

Dilbata waaree booda sa’aatii 10:30 eegalee falmiin Cheelsiin – Astoon Viilaa, Maanchiister Yuunaayitiid – Eevatan, Tootenhaam – Fuulhaam waliin taasisan akkaan eegam.

Dilbata galgala sa’aatii 1:00 irraa eegalee taphni cimaan torbee kanaa Liiverpuul – Maanchiister Siitii keessummeessu tapha hawwiin eegamuudha.

Kilaboonni lamaan bara Faranjootaa 1995 as taphoota waliin taphatan 59 keessaa Liiverpuul yeroo 25 yoo injifatu, Siitiin yeroo 12 injifachuun, si’a 22 ammoo qixaan xumuraniiru.

Waliigalaan taphoota hanga ammaatti waliin taphatan 177 keessaa Liiverpuul yeroo 81 yoo injifatu Maanchiister Siitiin taphoota 47 olaantummaan golobeera.

Taphoota 48 ammoo qabxii qoodataniiru.

#Oromia #Ethiopia