Rakkoo nageenyaa godinaalee lixa oromiyaatti qaamoolee hidhateen ga’aa jiru dhaabsisuuf xiyyeeffannoon hojjetamaa jira jedhame
Finfinnee, Eebila 30, 2012 (FBC) – Rakkoo nageenyaa godinaalee Lixa Oromiyaatti qaamoolee hidhateen ga’aa jiru dhaabsisuuf tarkaanfiin fudhatamu cimee kan itti fufu ta’uu Koomishiniin Poolisii Oromiyaa beeksise.
Mootumman olaantummaa seeraa kabachiisuuf of eeggannoon tarkaanfii fudhachaa jiraachuu itti aanaa Koomishinariin Koomishinii Poolisii Oromiyaa Girmaa Galaan ibsa haala yeroo irratti laataniin himaniiru.
Itti aanaan Koomishinarichaa miseensoonni ABO shanee lammiilee nagaa, miseensoota Poolisii fi lammilee alaarratti ajjeechaa raawwachaa jiru jedhan.
Haleellaa qaamooleen kunneen fudhachaa jiraniin lammiileen hedduun qa’ee fi qabeenya isaaniirraa buqqa’aniiru jedhan ibsa isaaniin.
Keessattuu dubartoota irra sarbamni mirga namoomaa fi gudeeddii hamaan ga’aa jiraachuu mirkanaa’eera jedhan.
Tarkaanfiin Poolisiin yeroo ammaa fudhataa jiru gochaa isaaniin kan wal hin ginne tarkaanfii gadi aanaa ta’uu ibsa laataniin himaniiru.
Miseensoota ABO shanee hidhatanii haleellaa raawwachaa jiran kanneen qaamooleen Loojastikii fi kanneen biroon deeggarsa taasisaa jiran jiraachuu isaanii ibsuun, dhimma kana ilaalchisee Poolisiin qorannoo taasisaa jiraachuu ibsaniiru.
Bu’aan qorannoo kanaans ummataaf kan ifoomu ta’uu Itti aanaan Koomishinarichaa ibsaniiru.
Xibabasillaasee Jambaruutu Gabaase.
Odeeffannoo waqtaawaa argachuuf Teelegraama keenya https://t.me/afanoromofana subiskiraayib godhaa.