በአዲስ አበባ ትህነግን የሚያወግዝ እንዲሁም ለመከላከያ ሰራዊትና ለሌሎች የፀጥታ አካላት ድጋፍ ለመግለጽ ነገ ሰልፍ ይካሄዳል

አዲስ አበባ ፣ ነሐሴ 1 ፣ 2013 (ኤፍ ቢ ሲ) አሸባሪው የትህነግ ቡድን ኢትዮጵያን ለማፈራረስ የሚያደርገውን እንቅስቃሴ ለማውገዝ እና ለመከላከያ ሰራዊታችን እና ለሌሎች የሃገርን ህልውና ለማስጠበቅ ለተሰማሩ የፀጥታ አካላት ያላቸውን ድጋፍ ለመግለፅ የአዲስ አበባ ከተማ እና በዙሪያዋ ያሉ የኦሮሚያ ልዩ ዞን ነዋሪዎች ከመከላከያ ሰራዊታችን ጎን መቆማቸውን ለማረጋገጥ በነገው ዕለት በመስቀል አደባባይ የድጋፍ ሰልፍ ያደርጋሉ፡፡

የአዲስ አበባ ከተማ እና በዙሪያዋ ያሉ የኦሮሚያ ልዩ ዞን ነዋሪዎች ነገ ነሃሴ 2 ቀን 2013 ዓ/ም በመስቀል አደባባይ የድጋፍ ሰልፍ ያደርጋሉ::

ሰልፉ ስኬታማ እንዲሆን የፀጥታ አካላት አስፈላጊውን ዝግጅት ማድረጋቸውን እና በዕለቱ ለትራፊክ ዝግ የሚሆኑ መንገዶችን የአዲስ አበባ ፖሊስ አስታውቋል፡፡

በሰልፉ ላይ በሺዎች የሚቆጠሩ ፈረሰኞችም ይሳተፋሉ ተብሎ ይጠበቃል፡፡

ነዋሪዎቹ ለፀጥታ ሃይሉ ደጀን መሆናቸውን ለማሳየት የሚያደርጉት ይህ የድጋፍ ሰልፍ በሰላም እንዲጠናቀቅ ከሌሎች ባለድርሻ አካላት ጋር ተቀናጅቶ ወደ ስራ መግባቱን የአዲስ አበባ ፖሊስ ገልጿል፡፡

ህብረተሰቡ ከዚህ በፊት የተደረጉ ልዩ ልዩ የአደባባይ ኩነቶች በሰላም እንዲጠናቀቁ በትዕግስት፣ በኢትዮጵያዊ ጨዋነትና በመደጋገፍ ላሳየው ቀና ትብብር የአዲስ አበባ ፖሊስ ምስጋናውን እያቀረበ በነገው ዕለት በሚካሄደው የድጋፍ ሰልፍ ላይ ለጋራ ደህንነት ሲባል ፍተሻ እንደሚኖር የፕሮግራሙ ተሳታፊዎች ተገንዝበው ለፍተሻ እንዲተባበሩ የአዲስ አበባ ፖሊስ ጥሪውን አስተላልፏል፡፡

በዕለቱ በመስቀል አደባባይ የሚካሄደው የድጋፍ ሰልፍ ተጀምሮ እስከሚጠናቀቅ ከሌሊቱ 11 ሰዓት ጀምሮ የተወሰኑ መንገዶች ለጊዜዉ ለትራፊክ ዝግ ይሆናሉ፡፡

በዚህም መሰረት፦
• ከቦሌ አየር መንገድ በሚሊኒየም አዳራሽ ወደ መስቀል አደባባይ የሚወስደው መንገድ ደንበል ሲቲ ሴንተር ኦሎፒያ አደባባይ

• ከመገናኛ ፣ በሃያ ሁለት ወደ መስቀል አደባባይ እንዲሁም ከቦሌ መድሃኔዓለም፣ በአትላስ ሆቴል ወደ መስቀል አደባባይ የሚወስደው መንገድ ኡራኤል ቤተ-ክርስቲያን አካባቢ
• ከአራት ኪሎ ወደ መስቀል አደባባይ የሚወስደው መንገድ ባሻወልዴ ችሎት ወይም ፓርላማ መብራት
• ከቸርችል ጎዳና ወደ መስቀል አደባባይ የሚወስደው መንገድ ቴዎድሮስ አደባባይ እና አገር አስተዳደር መብራት ወይም ኢሚግሬሽን
• ከተክለ ሀይማኖት በሜትሮሎጂ መስቀል አደባባይ የሚወስደው መንገድ ሜትሮሎጂ መስሪያ ቤት አካባቢ
• ከተክለ ሀይማኖት ፣ በጥቁር አንበሳ ሆስፒታል፣ ኢሚግሬሽን ጥቁር አንበሳ የኋላ በር
• ከጌጃ ሰፈር ፣ ጤና ጥበቃ፣ ብሄራዊ ቲያትር የሚወስደው መንገድ ጎማ ቁጠባ
• ከሳሪስ በጎተራ ወደ መስቀል አደባባይ የሚወስደው መንገድ አጎና ሲኒማ እና አራተኛ ክፍለ ጦር
• ከጦር ኃይሎች ፣ ልደታ ፣ ፖሊስ ሆስፒታል ሜክሲኮ አደባባይ
• ከጦር ኃይሎች ወደ ልደታ ፣ ፖሊስ ሆስፒታል ፣ ሜክሲኮ፣ ለገሀር የሚወስደው መንገድ ለገሃር መብራት አካባቢ ለተሽከርካሪ ዝግ ይሆናሉ፡፡

በተጨማሪም ከዋዜማው ምሽት ጀምሮ ሥነ- ስርዓቱ በሚከናወንበት እና ዝግ በሚሆኑ መንገዶች አካባቢ ለአጭርም ሆነ ለረጅም ሰዓት ተሽከርካሪ አቁሞ መሄድ ፍፁም የተከለከለ መሆኑን አሽከርካሪዎች ተገንዝበው አማራጭ መንገዶችን እንዲጠቀሙ የአዲስ አበባ ፖሊስ እያሳሰበ ህብረተሰቡ ጥቆማ ለመስጠት ወይም የፖሊስ አገልግሎትን ማግኘት ሲፈልግ በ011-1-11-01-11 ወይም በነፃ የስልክ መስመር 991 እንዲሁም በፌደራል ፖሊስ ስልክ ቁጥሮች 011-5- 52-63-03 እና በነፃ የስልክ ጥሪ 987 መጠቀም እንደሚችል አስታውቋል፡፡

ወቅታዊ፣ትኩስ እና የተሟሉ መረጃዎችን ለማግኘት፡-
ድረ ገጽ፦ https://www.fanabc.com/
ፌስቡክ፡- https://www.facebook.com/fanabroadcasting
ዩትዩብ፦ https://www.youtube.com/c/fanabroadcastingcorporate/
ቴሌግራም፦ https://t.me/fanatelevision
ትዊተር፦ https://twitter.com/fanatelevision በመወዳጀት ይከታተሉን፡፡
ዘወትር፦ ከእኛ ጋር ስላሉ እናመሰግናለን!