ለደቡብ ወሎ ዞን 30 ሚሊየን ብር የሚገመት ድጋፍ ተደረገ

አዲስ አበባ፣ ሕዳር 9፣ 2017 (ኤፍ ቢ ሲ) በደቡብ ወሎ ዞን ለተለያዩ ወረዳዎች 30 ሚሊየን ብር የሚገመት ድጋፍ ተደርጓል፡፡

የኢትዮጵያ ቀይ መስቀል ደሴ ቅርንጫፍ ከእንግሊዝ መንግስት ጋር በመተባበር በደቡብ ወሎ ዞን ለተለያዩ ወረዳዎች ለሚገኙ ጤና ተቋማት 10 ሚሊየን ብር የሚገመት የሕክምና ቁሳቁስ ድጋፍ ማድረጉ ተጠቁሟል፡፡

በተጨማሪም ተቋማቱ በዞኑ የተለያዩ አካባቢዎች ለሚገኙ የማህበረሰብ ክፍሎች የንጹሕ መጠጥ ውሃ እና የመጸዳጃ ቤቶችን ገንብተው ማስረከባቸው ተገልጿል፡፡

ለዚህም የሕክምና ቁሳቁስ ድጋፉን ጨምሮ በአጠቃላይ ከ30 ሚሊየን ብር በላይ ወጪ መደረጉ ነው የተመላከተው፡፡

የደቡብ ወሎ ዞን ጤና መምሪያ ሃላፊ አቶ ጌታቸው በለጠ ÷ተቋማቱ ያደረጉት ድጋፍ በወሳኝ ጊዜ የደረሰና የጤና ተቋማቱን የሚያጠናክር ነው ብለዋል።

የደቡብ ወሎ ዞን ቀይ መስቀል ማህበር ቅርንጫፍ ጽ/ቤት ሃላፊ አቶ መላኩ ቸኮል በበኩላቸው ÷የተደረጉ ድጋፎች በጥናት የተለዩ መሆናቸውን ገልፀው ማህበሩ የተቸገሩትን የመርዳት ተግባሩ እንደሚያጠናክር ተናግረዋል፡፡

ድጋፍ የተደረገላቸው የጤና ተቋማትና ማህበረሰቦችም የተደረገው ድጋፍ የሚታዩ እጥረቶችን የቀረፈና በአስፈላጊ ሰዓት የተገኘ ችግር ፈቺ ነው ሲሉ ገልፀዋል።

በከድር መሃመድ