በሞሮኮ የእጅ ኳስ ሻምፒዮና ኢትዮጵያ በሶስት ክለቦች ትወከላለች

አዲስ አበባ፣ መስከረም 29፣ 2017 (ኤፍ ቢ ሲ) በሞሮኮ ላዩን ከተማ በሚካሄደው 45ኛው የአፍሪካ ክለቦች የወንዶች እና ሴቶች እጅ ኳስ ሻምፒዮና ኢትዮጵያ ሶስት ክለቦችን እንደምታሳትፍ ተገለፀ፡፡

በዚህም መሰረት መቻል፣ ቂርቆስ ክፍለ ከተማ እና መቐለ 70 እንደርታ እጅ ኳስ ክለቦች በመድረኩ ኢትዮጵያን በመወከል ይሳተፋሉ።

በወጣው ምድብ መሰረትም መቻል እጅ ኳስ ክለብ ከቤኒኑ አድጂዳ፣ ከሞሮኮው ዊዳድ እና ከሴኔጋሉ አስፋ ጋር የተደለደለ ሲሆን፤ ቂርቆስ ክፍለ ከተማ እጅ ኳስ ከግብፁ ዛማሊክ፣ ከሞሮኮው ማውንታዳ እንዲሁም ከካሜሮኑ ፍሬንድሺፕ ክለቦች ጋር ተደልድሏል፡፡

የመቐለ 70 እንደርታ እጅ ኳስ ክለብ ደግሞ ከግብፁ አልሀሊ፣ ከኮንጎው ኢትኦይሌ እንዲሁም ከኮንጎው ሲኤፍጄኤሶ ጋር መደልደላቸው የአፍሪካ እጅ ኳስ ኮንፌዴሬሽን መረጃ ያመላክታል፡፡