Fana: At a Speed of Life!

14ኛውን የብሄር ብሄረሰቦች ቀን በማስመልከት በአዳማ ሳምፖዚየም ተካሄደ

አዲስ አበባ፣ ህዳር 23፣ 2012 (ኤፍ.ቢ.ሲ) 14ኛውን የኢትዮጵያ ብሄር ብሄረሰቦች እና ህዝቦች ቀንን በማስመልከት በአዳማ ከተማ ሲምፖዚየም በዛሬው እለት ተካሂዷል።

በሲምፖዚየሙ ላይ የጨፌ ኦሮሚያ አፈ ጉባዔ ወይዘሮ ሎሚ በዶ፣ የአዲስ አበባ ከተማ ምክር ቤት አፈ ጉባዔ ወይዘሮ አበበች ነጋሽና የጋምቤላ ክልል ምክር ቤት አፈ ጉባዔን ጨምሮ አባ ገዳዎች፣ የሀይማኖት አባቶች፣ የሀገር ሽማግሌዎች እንዲሁም ሌሎች የህብረተሰብ ተወካዮች ተሳትፈዋል።

ሲምፖዚየሙን በንግግር የከፈቱት የጨፌ ኦሮሚያ አፈ ጉባዔ ወይዘሮ ሎሚ በዶ፥ የኢትዮጵያ ብሄር ብሄረሰቦች እና ህዝቦች ቀን የሀገሪቱ ብሄር ብሄረሰቦች ያካሄዱትን መራራ ትግል ተከትሎ በተቀዳጁት ድል የሀገሪቱን ህግ መንግስት ያፀደቁበት እለት ነው ብለዋል።

የብሄር ብሄረሰቦች እና ህዝቦች መብትና እና እኩልነትን ለማስጠበቅ የሚሰሩ ስራዎች ወደፊትም ተጠናክረው እንደሚቀጥሉ አስታውቀዋል።

የህዝቦች የእርስ በእርስ ግንኙነት በሁሉም ዘርፍ ለሚገኘው ጥቅም ትልቅ ድርሻ ይወጣል ያሉት ወይዘሮ ሎሚ፥ ልዩነታችን ውበታችን መሆኑን ደግመን መረዳት ያስፈልጋልም ብለዋል።

በተለያዩ አካባቢዎች የሚስተዋሉ ችግሮች ጊዜያዊ መሆኑን በመረዳት የኢትዮጵያ ብሄር ብሄረሰቦች እና ህዝቦች ግንኙነታቸን በማጠናከር በዓሉን ልዩ በሆነ መልኩ ሊያከብሩ እንደሚገባም ጥሪ አቅርበዋል።

በኦሮሚያ ክልል አዘጋጅነት በአዲስ አበባ ከተማ የሚከበረው 14ኛው የኢትዮጵያ ብሄር ብሄረሰቦች እና ህዝቦች ቀን ሀገሪቱ ካለችበት ወሳኝ ሁኔታ አንፃር በከፍተኛ ርብርብ እና በፍቅር እንዲከበር የህዝቡ ድጋፍ ወሳኝ መሆኑንም አንስተዋል።

You might also like
Comments
Loading...