Fana: At a Speed of Life!

የጀርመን መንግስት ለኢትዮጵያ የ352 ነጥብ 5 ሚሊየን ዩሮ ድጋፍ አደረገ


አዲስ አበባ፣ ህዳር 22 ፣2012 (ኤፍ.ቢ.ሲ) የጀርመን መንግስት ለኢትዮጵያ የ352 ነጥብ 5 ሚሊየን ዩሮ ድጋፍ ማድረጉ ተገለፀ።

ከገንዘብ ድጋፉ ውስጥ 110 ሚሊየን ዩሮው በቀጥታ ለመንግስት በጀት ድጋፍ የሚውል መሆኑ ታውቋል።

በጀርመን የኢኮኖሚያዊ ትብብር ሚኒስትር ዶክተር ገርድ ሙለርን እና የሠራተኛና ማኅበራዊ ጉዳይ ሚኒስትር ሁበርተስ ሄሊን የተመራ ልኡካን ቡድን በኢትዮጵያ የአራት ቀናት ይፋዊ ጉብኝት እያደረገ ነው።

ልኡኩ በዛሬው እለትም ከኢፌዴሪ ጠቅላይ ሚኒስትር ዶክተር ዐቢይ አህመድ ጋር ተገናኝቶ ተወያይቷል።

የከፍተኛ አመራሮች ጉብኝት ከጥቂት ሳምንታት በፊት በበርሊን ከተካሄደውን የጂ20 ኮምፓክት አፍሪካ ኮንፈረንስ ተከትሎ የተካሄደ ሲሆን፥ በወቅቱም ኢትዮጵያና ጀርመን የግሉን ዘርፍ ኢንቨስትመንት እና ዘላቂ የኢኮኖሚ ልማትን ለማበረታታት በለውጥ አጋርነት ላይ ስምምነት መፈራረማቸው የሚታወስ ነው።

ስምምነቱን እውን ለማድረግ የሁለትዮሽ ውይይት ከተካሄደ በኋላ ጠቅላይ ሚኒስትር ዶክተር ዐቢይ አህመድ ጀርመን በኢትዮጵያ የለውጥ አጋርነትን እንዲሁም ቀጣይ የትብብር ማዕቀፍን ለማስቀጠል 352 ነጥብ 5 ሚሊየን ዩሮ የለገሰችበትን ስምምነት አፈራርመዋል።

ጠቅላይ ሚኒስትር ዶክተር ዐቢይ በተጨማሪም የግብርናን ዘዴ ለማሻሻል ይረዳ ዘንድ ድጋፍ እንዲደረግ በጠየቁት መሠረት የጀርመን መንግሥት የለገሳቸው መለዋወጫ የተሟላላቸው የ144 የግብርና መሣሪያዎችን ቁልፎች የርክክብ ሂደት በሚመለከታቸው አካላት መካከል አስፈጽመዋል።

በውይይቱ ወቅትም የጀርመን መንግስት ያደረገው የገንዘብ ድጋፍ ኢትዮጵያ እያካሄደች ያለውን የሪፎርም ስራዎች ለመደገፍ የሚውል መሆኑ ተገልጿል።

በአልዓዛር ታደለ

 

You might also like
Comments
Loading...