Fana: At a Speed of Life!

የደረሱ ሰብሎችን ለመሰብሰብ ሁሉም እንዲረባረብ ጥሪ ቀረበ

አዲስ አበባ ፣ ህዳር 22 ፣ 2012 (ኤፍ ቢ ሲ) የደረሱ ሰብሎችን ለመሰብሰብ ሁሉም የህብረተሰብ ክፍል ሊረባረብ እንደሚገባ የግብርና ሚኒስቴር ጥሪ አቀረበ።

በዘንድሮው የመኸር ምርት ዘመን 12 ነጥብ 5 ሚሊየን ሄክታር መሬት በተለያዩ ሰብሎች በዘር ቢሸፈንም እየጣለ ያለው ወቅቱን ያልጠበቀ ዝናብ አሉታዊ ተፅዕኖ እያሳደረ ነው።

ከዚህ ጋር ተያይዞም አርሶ አደሩ የደረሱ ሰብሎችን በደቦ እየሰበሰበና በአንዳንድ አካባቢወችም የአካባቢውን ወጣቶችና ተማሪዎችን ባሳተፈ መልኩ ሰብሎችን የመሰብሰብ ስራ እየተሰራ ይገኛል።

የብሄራዊ ሚቲዮሮሎጅ ኤጀንሲ መረጃ እንደሚያመላክተው በያዝነው ሳምንት ያለው የአየር ሁኔታ ጥሩ የሚባል ቢሆንም ቀጣይነት ግን አይኖረውም።

ከታህሳስ ወር መጀመሪያ ጀምሮም በተለያዩ አካባቢዎች ወቅቱን ያልጠበቀው ዝናብ እንደሚቀጥል የኤጀንሲው ዋና ዳይሬክተር አቶ ፈጠነ ተሾመ ይናገራሉ።

ይህን መነሻ በማድረግም አሁን ያለውን ጥሩ የአየር ሁኔታ በመጠቀም አርሶ አደሩ የደረሱ ሰብሎችን በፍጥነት ሊሰበስብ ይገባል ብለዋል።

የግብርና ሚኒስትር ዲኤታ አቶ ሳኒ ረዲ ከፋና ብሮድካስቲንግ ኮርፖሬት ጋር ባደረጉት ቆይታ ሰብሎቹን ከጉዳት ለመከላከል፥ በሀገር አቀፍ ደረጃ በህብረት የሚሰራበትን ስራ ማሳለጥ የሚያስችል ኮሚቴ ተቋቁሞ እየተሰራ መሆኑን ተናግረዋል።

አቶ ሳኒ እንደሚሉት እስካለፈው ሳምንት መጨረሻ ድረስ ከደረሰው ሰብል ውስጥ 50 በመቶ ያህል ሰብል ተሰብስቧል።

ከሳምንቱ መጨረሻ እስከዛሬ ያለው ሀገራዊ ሪፖርት ባይደርስም ካሉት መረጃዎች በመነሳት የተሰበሰበው ሰብል ከ60 በመቶ እንደማይበልጥም አንስተዋል።

ትግራይ፣ ኦሮሚያ እና አማራ ክልሎች የሰብል ስብሰባ ደረጃቸው የተሻለ መሆኑን ያነሱት አቶ ሳኒ፥ በአንጻሩ ደቡብ ክልል ላይ አብዛኛዎቹ ሰብሎች አለመነሳታቸውን ገልጸዋል።

በተለይም ደጋማ አካባቢዎች እንደ ገብስ እና ጤፍ ያሉ ሰብሎች አለመሰብሰባቸውን ጠቅሰዋል።

አሁን ላይ ተማሪዎችና የመንግስት ሰራተኞችን ጨምሮ ሁሉንም የህብረተሰብ ክፍል ባሳተፈ መልኩ እየተከናወነ ያለው የሰብል ስብሰባ ሊቀጥል እንደሚገባም አሳስበዋል።

አርሶ አደሩም በእነዚህ ሶስት ቀናት በታየው ጥሩ የአየር ሁኔታ ሳይዘናጋ የመሰብሰብ ሂደቱን አጠናክሮ ሊቀጥል ይገባልም ነው ያሉት።

 

በዙፋን ካሳሁን

 

 

 

 

 

You might also like
Comments
Loading...