Fana: At a Speed of Life!

የከተሞችን ምግብ ዋስትና ፕሮጀክት ለማጠናከር የሚያግዙ የ23 ተሸከርካሪዎች ርክክብ ተካሄደ

አዲስ አበባ፣ ህዳር 23፣ 2012(ኤፍ ቢ ሲ) ክልሎች፣ የከተማ አስተዳደሮችና የዘርፉ አስፈፃሚ ተቋማት የከተሞችን የምግብ ዋስትና ለማረጋገጥ ለሚያከናውኗቸው የምግብ ዋስትና ፕሮጀክቶች እገዛ የሚውሉ የ23 ተሽከርካሪዎች ርክክብ ተካሂዷል።

የከተሞች የምግብ ዋስትና ፕሮግራም ስትራቴጂ በ300 ሚሊየን ዶላር የአለም ባንክ ብድር እና በ150 ሚሊየን ዶላር በኢትዮጵያ መንግስት ወጪ ትብብር በ2009 ዓ.ም በ11 ከተሞች ተግባራዊ መደረግ መጀመሩ ይታወሳል።

በፕሮግራሙ እስካሁን በቀጥታ ድጋፍ እና በተለያዩ የአረንጓዴ ልማት ስራዎች 604 ሺህ ዜጎች ተጠቃሚ መሆናቸው ነው የተገለጸው።

በርክክብ ስነ ስርዓቱ ላይ በክብር እንግድነት የተገኙት የከተማና ኮንስትራክሽን ሚኒስትር ወይዘሮ አይሻ መሃመድ፥የከተሞች የምግብ ዋስትና ስትራቴጂ ከደህነት ወለል በታች ላሉ የከተማ ነዋሪዎች የምግብ ዋስትናቸውን እንዲያረጋግጡ በማድረግ በኩል ከፍተኛ አስተዋፅኦ እያበረከተ እንደሚገኝ ተናግረዋል።

ፕሮጀክቱ ከደህነት በታች የሚገኙ በዕድሜ የገፉ ጧሪና ቀባሪ የሌላቸውን እንዲሁም ተደራራቢ አካል ጉዳት የደረሰባቸውን ዜጎች ተጠቃሚ ማድረግ መቻሉን አንስተዋል።

በቀጣይም ፕሮጅክቱን ወደ 72 ከተሞች ለማስፋት የቅድመ ዝግጅት ስራዎች እየተከናወኑ መሆኑን ነው የገለጹት።

ለክልሎችና ለከተማ አስተዳደሮች የተሰጡ ተሽከርካሪዎች ለታለመላቸው ዓላማ ውለው ዜጎችን ይጠቅሙ ዘንድ የሚመለከታቸው አካላት የበኩላቸውን ሚና እንዲወጡም አሳስበዋል።

የከተሞች የምግብ ዋስትናና ስራ ፈጠራ ኤጀንሲ ዋና ዳይሬክተር አቶ ዘነበ ኩሞ በበኩላቸው፥ የተለገሱት ተሽከርካሪዎች የፕሮጀክቱን ዓላማ እና ተግባራት በማሳካት በኩል ከፍተኛ እገዛ እንደሚኖራቸው ጠቁመዋል።

በትዝታ ደሳለኝ

You might also like
Comments
Loading...