Fana: At a Speed of Life!

የምንፈልጋት ኢትዮጵያ በ2032 በሚል ርእስ ሀገር አቀፍ የውይይት መድረክ ተካሄደ

አዲስ አበባ፣ ህዳር 23፣ 2012 (ኤፍ.ቢ.ሲ) የምንፈልጋት ኢትዮጵያ በ2032 በሚል ርእስ ሀገር አቀፍ የውይይት መድረክ በአዲስ አበባ ከተማ ተካሂዷል።

ሀገር አቀፍ የውይይት መድረኩን በፎረም ኦፍ ፌዴሬሽን እና ዴስትኒ ኢትዮጵያ ኢኒሼቲቭ ናቸው በጋራ ያዘጋጁት።

በመድረኩ ላይም የሰላም ሚኒስትር ወይዘሮ ሙፈሪያት ካሚልን ጨምሮ የክልል ርእሳነ መስተዳድሮች እና ምክትል ርእሳነ መስተዳድሮች፣ የፌደራል እና የክልል ከፍተኛ የስራ ኃላፊዎች ተገኝተዋል።

በተጨማሪም የበርካታ ሀገር አቀፍ እና ክልላዊ የፖለቲካ ፓርቲ አመራሮች እና ተወካዮችም፣ የሀገር ሽማግሌዎች እንዲሁም የተለያዩ የህብረተሰብ ተወካዮች በመድረኩ ላይ ተሳትፈዋል።

መድረኩ የሀገሪቱን የፖለቲካ ፓርቲዎች እና ሌሎች የሚመለከታቸው አካላትን በማቀራረብ የወደፊት የሀገሪቱ እጣ ፈንታ ላይ ለመወያየት በማለም የተዘጋጀ መሆኑ ተገልጿል።

የሰላም ሚኒስትር ወይዘሮ ሙፈሪያት ካሚል በመድረኩ ላይ ባደረጉት ንግግር፥ እንዲህ አይነቱ መድረክ ሁላችንም ለኢትዮጵያ እንደምናስፈልጋት ያስተማረ ነው ብለዋል።

የዚህ የውይይት መድረክ ሂደት ስድስት ወራትን የፈጀ መሆኑን የጠቀሱት ወይዘሮ ሙፈሪያት፥ ሂደቱ በአብሮነት እና በመቀራረብ ውስጥ ያለውን የልብ ጆሮ የመክፈት ሀይልን ያመላከተ መሆኑንም ጠቅሰዋል።

ሂደቱ አዲስ የፖለቲካ ባህልን ለመገንባት አስቻይ መንገድን ያሳየን ነው ሲሉም ተናግረዋል።

በተጨማሪም ራስን እንዴት ማሸነፍና መስራት ይቻላል የሚለውን እና ህግን ማክበር እንዴት እንደሚቻል ያስተማረ መሆኑንም ነው ያስታወቁት።

የሴናሪዮ ምክክር ሂደቱ ውጤትም ለመንግስት ግብአት ሆኖ የሚያገለግል መሆኑንም ነው ሚኒስትሯ ወይዘሮ ሙፈሪያት የገለፁት።

ከአራቱ ሴናሪዮ (እጣ ፈንታዎች) ውስጥ “ንጋት” በሚል የተሰየመችውን ኢትዮጵያ እውን ለማድረግ ዛሬ ላይ በጉልበት፣ በእውቀት እና በሀብት ሳንሰስት መስራት ይጠበቅብናል ብለዋል።

“በወገኖቼ ላይ ትልቅ እምነት አለኝ” ያሉት ወይዘሮ ሙፈሪያት፥ “የኢትዮጵያ ህዝብ ስለ ሰላም የሚፀልይ፣ ዱአ የሚያደርግ እና የሚተጋ በመሆኑ እምነት አለኝ” ብለዋል።

በመድረኩ ላይ ከ50 በላይ የተቋማት መሪዎች በኢትዮጵያ የወደፊት እጣ ፈንታ ላይ ሲያደርጉት በነበረው ምክክር ዙሪያ ንግግር አድርገዋል።

በዚህም ሂደት ተሳታፊ የሆኑ የፖለቲካ ፓርቲ ተወካዮችም፤ በመድረኩ ደስተኛ መሆናቸውን በመግለፅ፤ አሁንም ለኢትዮጵያ በርትተው እንዲሰሩ እድል የፈጠረ መሆኑን ተናግረዋል።

የፖለቲካ ፓርቲ አመራሮች እና ተወካዮቹ ከዚህ ቀደም በዚህ መድረክ ስር በጋራ በነበራቸው ቆይታ ስለ ሀገሪቱ ፖለቲካ በስፋት መምከራቸውን እና በሀገሪቱ የሚስተዋሉ ችግሮች በውይይት ብቻ የሚፈቱ እንደሆኑ ከመግባባት መድረሳቸውን አስታውቅዋል።

የኢዜማ መሪ ፕሮፌሰር ብርሃኑ ነጋ፥ መድረኩ በሀገር ጉዳይ ሁሉም በንግግር የሚፈታ መሆኑን ልምድ የተገኘበት ነው ሲሉ ተናግረዋል።

የአብን ሊቀ መንበር ዶክተር ደሳለኝ ጫኔ፥ መድረኩ የተራራቀ አቋም ያላቸው የፖለቲካ ሀይሎችን ያቀራረበ መሆኑን ተናግረዋል።

በፖለቲካ ፓርቲዎች መካከል ምንም አይነት የተራራቀ የአቋም ልዩነት ቢኖርም፤ በመቀራረብ እና በመወያየት የማይፈታ ነገር እንደሌለ ያስተማረ መሆኑን ተቅሰዋል።

የኦነግ ሊቀ መንበር አቶ ዳውድ ኢብሳም፥ “መድረኩ መጀመሪያ ሲጀመር ውጤቱ ላይ ጥርጣሬ ነበረኝ፤ ወደ ስራ ስንገባ ግን ቀስ በቀስ በመነጋገር፣ በመወያየትና በሰላማዊ መንገድ መፍትሄ መፈለግ እንደሚቻል ልምድ ያገኘሁበት ነው” ብለዋል።

የአዴፓ ተወካይ ዶክተር ስንታየሁ ወልደሚካኤል፥ “በመድረኩ በጋራ በመሆን ሀገርን፣ የዴሞክራሲ ስርዓትን፣ መንግስትን እና ኢኮኖሚን መገንባት እንደሚቻል አረጋግጫለሁ” ብለዋል።

የሀገር ሽማግሌ ተወካዮችም፥ መድረኩ ለኢትዮጵያ መፃኢ እድል በር የሚከፍት መሆኑን በመግለጽ፤ ለኢትዮጵያ ስንል ሁላችንም ዝቅ ብለን እንስራ ሲሉ ተናግረዋል።

በመጨረሻም የመድረኩ ተሳታፊዎች “ንጋት፣ የፉክክር ቤት፣ አፄ በጉልበቱ እና ሰባራ ወንበር” በሚሉ አራት ሴናዊዮ (እጣ ፈንታ) ዙሪያ ለስድስት ወራት በዝግ ስብሰባ በግልፅ በሀገሪቱ ፈታኝ እና ወሳኝ ሁኔታዎች ዙሪያ መወያየታቸውን አስታውቅዋል።

የመድረኩ ተሳታፊዎች በውይይታቸውም የአቋም መግለጫቸውን ያወጡ ሲሆን፥ ሁሉም ለኢትዮጵያ ሰላም በይቅርታ እና በወንድማማችነት መንፈስ በመነሳት፣ በትጋትና በወንድማማችነት ስሜት ለሀገር ሰላም እንዲሰራ ጥሪ አቅርበዋል።

በሙለታ መንገሻ

You might also like
Comments
Loading...