Fana: At a Speed of Life!

የሃገራት መሪዎች በአየር ንብረት ለውጥ ላይ እየመከሩ ነው

አዲስ አበባ ፣ ህዳር 22 ፣ 2012 (ኤፍ ቢ ሲ) ትኩረቱን በአየር ንብረት ለውጥ ላይ ያደረገው ጉባኤ እየተካሄደ ነው።

ለሁለት ሳምንታት የሚቆየው ይህ ጉባኤ በስፔኗ መዲና ማድሪድ ነው እየተካሄደ ያለው።

ከቺሊ ወደ ስፔን የተዛወረው ጉባኤ በዋናነት የምድራችን ስጋት በሆነው የአየር ንብረት ለውጥ ላይ ትኩረቱን አድርጎ ይመክራል ነው የተባለው።

በጉባኤው ላይ የ50 ሃገራት መሪዎች፣ የአየር ንብረት ለውጥ ተሟጋቾች እና የዓለም አቀፍ ተቋማት መሪዎች ይሳተፋሉ ተብሏል።

የአየር ንብረት ለውጥ አሁን ላይ የዓለማችን ከፍተኛው ስጋት ሆኗል።

ተመራማሪዎችም የሰው ልጅ በከባቢ አየር ላይ የሚያሳድረውን ተፅዕኖ መቀነስ ካልቻለ ቀጣዩ ጊዜ ከባድ መሆኑን አስጠንቅቀዋል።

ከቅርብ ጊዜያት ወዲህም በከባቢ አየር ላይ የተከማቸው የበካይ ጋዝ መጠን ከእስከዛሬዎቹ ከፍተኛው ሆኖ ተመዝግቧል።

በዋልታዎች አካባቢ ያለው የበረዶ ግግርም እየቀለጠ የባህር የከፍታ መጠንም እየጨመረ መሆኑን መረጃዎች ያመላክታሉ።

ዓለም አቀፉ ግብረ ሰናይ ድርጅት ሴቭ ዘ ቺልድረን ደግሞ የአየር ንብረት ለውጥ በሚሊየን የሚቆጠሩ አፍሪካውያንን ለርሃብ መዳረጉን ይገልጻል።

ከአየር ንብረት ለውጥ ጋር በተያያዘ በተከሰተ ድርቅና መሰል አደጋዎች ሳቢያም 33 ሚሊየን ሰዎች ለአስቸኳይ የምግብ እርዳታና ድጋፍ ተዳርገዋልም ነው ያለው።

 

 

ምንጭ፦ ቢቢሲ

You might also like
Comments
Loading...