Fana: At a Speed of Life!

ዓለም አቀፍ የፀረ-ኤች አይ ቪ (ኤድስ) ቀንን አስመልክቶ የግንዛቤ ማስጨበጫ ውይይት ተካሄደ

አዲስ አበባ፣ ህዳር 22፣ 2012 (ኤፍ.ቢ.ሲ) የዓለም አቀፍ የፀረ-ኤች አይ ቪ/ኤድስ ቀንን አስመልክቶ የግንዛቤ ማስጨበጫ የውይይት መድረክ ተካሂዷል።

የዘንድሮው ዓለም አቀፍ የፀረ-ኤች አይ ቪ/ኤድስ ቀን “ማህበረሰቡ የለውጥ አቅም ነው!” በሚል መሪ ቃል ይከበራል።

በዚህ መሰረት በዛሬው ዕለት በልዩ ልዩ ዝግጅቶች በሴክተር ደረጃ የግንዛቤ ማስጨበጫ ውይይት በኢትዮጵያ ብሔራዊ ቴአትር ተካሂዷል።

ዕለቱ በዓለም አቀፍ ደረጃ ለ33ኛ ጊዜ በሀገራችን ደግሞ ለ32ኛ ጊዜ የተከበረ ሲሆን፥ ፕሮግራሙን የኢፌዴሪ ባህልና ቱሪዝም ሚኒስቴር የዋና መስሪያ ቤት ሠራተኞች ከአምስቱ ተጠሪ ተቋማት ሠራተኞች ጋር በመተባበር አዘጋጅተውታል።

የኢፌዴሪ ባህልና ቱሪዝም ሚኒስትር ዶክተር ሂሩት ካሳው፥ ዜጎች ራሳቸውን ከኤች.አይ.ቪ/ኤድስ እንዲጠብቁ፣ በበሽታው የተያዙት እንዲደገፉ እንዲሁም ዜጎች መልካም ስነ ምግባር እንዲኖራቸው የግንዛቤ ማስጨበጥ ስራ መሰራት እንዳለበት ተናግረዋል።

የዛሬ አምስት ዓመት ሀገሪቱን ከበሽታው ነፃ ለማድረግ ሁሉም የበኩሉን ድርሻ መወጣት እንዳለበት ጥሪ ማቅረባቸውን ከባህልና ቱሪዝም ሚኒስቴር ያገኘነው መረጃ ያመላክታል።

በመርሃ ግብሩ አንጋፋው የኢትዮጵያ ብሔራዊ ቴአትር የሙዚቃ ቡድን ልዩ ልዩ የብሔር ብሔረሰብ ጣዕመ ዜማዎችን አቅርቧል።

ከትዳር አጋር ጋር ለመኖርና ጤናን ለማወቅ አስቀድሞ መመርመር ላይ የተመሠረተ አጭር የመድረክ ድራማም ቀርቦ በታዳሚው ግንዛቤ ተወስዷል።

በሌላ በኩል ኤች አይ ቪ (ኤድስ) በኢትዮጵያ አሁን ያለበትን ሁኔታ በማስመልከት በዶክተር መስፍን አጋጨው የአዲስ አበባ ጤና ጽህፈት ቤት ጥናታዊ ጽሑፍ ቀርቦ ገለፃና ውይይት ተደርጎበታል።

You might also like
Comments
Loading...