Fana: At a Speed of Life!

በደብረ ብርሃን ከተማ ከ100 ሺህ በላይ ለሆኑ ወጣቶች የስራ እድል ለመፍጠር አየተሰራ ነው

አዲስ አበባ፣ ህዳር 23፣ 2012 (ኤፍ ቢ ሲ) በአማራ ክልል ደብረ ብርሃን ከተማ እና አካባቢዋ ከ100 ሺህ በላይ ለሆኑ ወጣቶች የስራ እድል ለመፍጠር እየተሰራ መሆኑን የአማራ ኢንዱስትሪ ፖርኮች ልማት ኮርፖሬሸን ገለፀ።

የኮርፖሬሽኑ ደብረ ብርሃን ቅርንጫፍ ቢሮ ሃላፊ አቶ ተሾመ ገብረ አምላክ ፥ በከተማዋ እና አካባቢው እየተገነቡ በሚገኙ የኢንዱስትሪ መንደሮች ሰፊ የስራ እድል እየተፈጠረ መሆኑን አብራርተዋል።

ከፋና ብሮድካስቲንግ ኮርፓሬት ጋር ቆይታ ያደረጉት ሃላፊው፥ በአካባቢው በተገነቡ አራት ሁለገብ የኢንዱስትሪ መንደሮች እስካሁን ለ27 ሺህ ወጣቶች የስራ እድል መፍጠር ተችሏል ብለዋል።

በፕላስቲክና ኬሚካል ማምረት ላይ የተሰማሩ 70 የሚደርሱ ፕሮጀክቶች በዘርፋ ስፊ ድርሻ ያላቸው መሆኑንም አንስተዋል።

የምግብና ምግብ ነክ እንዲሁም ጨርቃ ጨርቅና አልባሳት ኢንዱስትሪዎች ያላቸው ተሳትፎ እንደሚነሳም ኮርፖሬሸኑ ጠቁሟል።

ደብረ ብርሃንና አካባቢው የግብርና ምርት አቅራቢነታቸውን በመጠቀም ከኢንዱስትሪዎች ጋር ለማስተሳሰር እየተሰራ እንደሆነም ተመላክቷል።

ባለሃብቱ የሚያነሳቸውን የመሰረተ ልማት ጥያቄዎች ለመፍታትም ከከተማ አስተዳደሩና ከክልሉ መንግስት ጋር በቅንጅት እየተሰራ መሆኑ ተገልጿል።

ፋና ብሮድካስቲንግ ኮርፖሬት ያነጋገራቸው የስራ እድል የተፈጠረላቸው ወጣቶች በበኩላቸው፥ እድሉ የስራ ልምድን ለማሳደግ ከፍተኛ አስተዋጽኦ ያለው መሆኑን ገልጸዋል።

በአወል አበራ

 

You might also like
Comments
Loading...