Fana: At a Speed of Life!

በኢትዮጵያ ፕሪምየር ሊግ ጨዋታዎች አራት ቡድኖች የውድድር ዘመኑን በድል ጀምረዋል

አዲስ አበባ፣ ህዳር 21፣ 2012 (ኤፍ.ቢ.ሲ) በኢትዮጵያ ፕሪምየር ሊግ በዛሬው ዕለት በተለያዩ የሀገሪቱ ክፍሎች ስድስት ጨዋታዎች ተካሂደዋል፡፡

በዚህም ሀዋሳ ከተማ ፣ ወልዋሎ ዓዲግራት ዩ ፣ መቐለ 70 እንደርታ እና ወላይታ ድቻ ተጋጣሚዎቻቸውን አሸንፈዋል፡፡

ሀዋሳ ከተማ ድሬዳዋን ከተማን አስተናግዶ በመስፍን ታደሰና ብሩክ በየነ ግቦች 2 ለ 1 ያሸነፈ ሲሆን የድሬዳዋን ብቸኛ ግብ ኤልያስ መሞ አስቆጥሯል፡፡

ወልዋሎ ዓዲግራት ዩኒቨርስቲም ዘንድሮ ፕሪምየር ሊጉን የተቀላቀለውን ሰበታ ከተማ 3 ለ 1 አሸንፈዋል፡፡

የወልዋሎን የማሸነፊያ ግቦች ካርሎስ ዳምጠው በ40ኛው ደቂቃ ፣ ሰመረ ሐፍታይ በ56ኛውና 90ኛው ደቂቃ ላይ ሲያስቆጥሩ ምስጋናው ወ/ዮሐንስ የሰበታ ከተማን ብቸኛ ግብ በ60ኛው ደቂቃ ላይ ማስቆጠር ችሏል፡፡

በትግራይ ስታድየም ሀዲያ ሆሳዕናን ያስተናገደው መቐለ 70 እንደርታ 2 ለ 1 አሸንፏል፡፡

የመቐለ 70 እንደርታ ግቦች ያሬድ ከበደ በ53ኛው ደቂቃ፤ አማኑኤል ገ/ ሚካኤል በ55 ኛው ደቂቃ ሲያስቆጥሩ ደስታ ጊቻሞ የሀድያ ሆሳዕናን ብቸኛ ግብ በ58ኛው ደቂቃ ላይ አስቆጥሯል፡፡

እንዲሁም ወላይታ ድቻ ሲዳማ ቡና አስተናግዶ 2 ለ 0 በማሸነፍ ውድድር ዘመኑን በድል ጀምሯል፡፡

ግቦችንም ባዬ ገዛኸኝ በ48ኛው ደቂቃ እና ኢድሪስ ሰዒድ በ81ኛው ደቂቃ ላይ ማስቆጠር ችለዋል፡፡

በሌሎች ጨዋታዎች ወልቂጤ ከቅዱስ ጊዮርጊስ እና አዳማ ከተማ ከፋሲል ከነማ 0 ለ 0 ሆነ ውጤት ተለያይተዋል፡፡

You might also like
Comments
Loading...