Fana: At a Speed of Life!

50 እንቁላሎችን በአንድ ጊዜ ለመመገብ የሞከረው ህንዳዊ ህይወቱ አለፈ

አዲስ አበባ፣ ጥቅምት 26፣ 2012 (ኤፍ ቢ ሲ) 50 የተቀቀሉ እንቁላሎችን በአንድ ጊዜ ለመመገብ የሞከረው ህንዳዊ ህይወቱ አልፏል፡

በህንድ ኡታር ፕራዴሽ ግዛት ሱብሃሽ ያዳቭ የተባለው የ42 ዓመት ግለሰብ ከጓደኞቹ ጋር በመወራረርድ 50 የተቀቀሉ እንቁላሎችን በአንድ ጊዜ ለመብላት ሲሞክር ህይወቱ ማለፉ ተሰምቷል።

አንዳንድ ጊዜ ጓደኛሞች ለየት ያሉ ነገሮችን በድል የመከወን አቅማቸውን  ለመፈታተሽ የተለያዩ ጨዋታወችን ብር እያስያዙ ይጫወታሉ።

ባሳለፍነው ሰኞ ዕለትም ያዳቭ እና  ጓደኞቹ  የተቀቀለ እንቁላል ለመብላት አቅራቢያቸው ወደ ሚገኝ  ገበያ ያመራሉ።

በዚህ ወቅትም ጓደኛሞቹ 50 የተቀቀሉ እንቁላሎችን በአንድ ጊዜ የመመገብ አቅም ያለው ማን ነው?  የሚል ሃሳብ ያመጣሉ።

እቁላሎቹን በልቶ የጨረሰም 2 ሺህ የህንድ ሩፒ ወይም 28 የአሜሪካ ዶላር  ተሸላሚ እንደሚሆን ይስማማሉ።

ከጓደኛሞች ውስጥ የ42 ዓመት ያዳቭ 50 የተቀቀሉ እንቁላሎችን በአንድ ጊዜ በልቶ የመጨረስ አቅም እንዳለው ይናገራል።

በሃሳቡ የተስማሙት ሌሎች ጓደኞቹም 50 እንቁላሎችን በመግዛት እንቁላሎቹን መብላት እንዲጀምር ያደርጋሉ።

በስምምነቱ መሰረ እንቁላሎችን አንድ በአንድ መብላት የጀመረው ያዳቭ፥ 24ኛው እንቁላል ላይ ሲደርስ ግን ያልጠበቀው ነገር ተከሰተ።

50 የተቀቀሉ እንቁላሎችን በአንድ ጊዜ መመገብ እችላለሁ በማለት የፎከረው ያዳቭ ፥24 እንቁላሎችን እንደ ተመገበ እራሱን መቆጣጠር አቅጦቶት ተዝለፍልፎ ወደቀ።

በአካባቢው የሚገኙት የአደጋ ጊዜ ሰራተኞችም  የያዳቭን ህይወት ለማትረፍ በፍጥነት አቅራቢያ ወደ ሚገኝ ጤና ጣቢያ ይወስዱታል።

የጤና ጣቢያው ሐኪሞችም የያዳቭን  ህይወት ለመታደግ  ከፍተኛ ጥረት ማድረጋቸው ተነግሯል።

ይሁን እንጂ ጥረታቸው ሳይሳካ ቀርቶ ለውርርድ 50 እንቁላሎችን  በአንድ ጊዜ ለመብላት የሞከረው ያዳቭ እስከወዲኛው ማሸለቡ ተሰምቷል።

ምንጭ፡-ኦዲቲሴንትራል

You might also like
Comments
Loading...