Fana: At a Speed of Life!

ጉድለት በተገኘባቸው የንግድ ድርጅቶች ላይ አስተዳደራዊ እርምጃ ተወሰደ

አዲስ አበባ፣ ህዳር 18፣ 2012 (ኤፍ ቢ ሲ) የንግድና ኢንዱስትሪ ሚኒስቴር ጉድለት በተገኘባቸው የንግድ ድርጅቶች ላይ አስተዳደራዊ እርምጃ መውሰዱን አስታወቀ።

ሚኒስቴሩ በተለያዩ የንግድ ድርጅቶች ላይ ባደረገው የውስጥና የውጪ የድህረ ፈቃድ የፍተሻ እና ቁጥጥር ስራ ህግን ተከትለው በማይሰሩ የንግድ ድርጅቶች ላይ አስተዳደራዊ እርምጃ መውሰዱን በጀት ዓመቱ የመጀመሪያ ሶስት ወራት የስራ አፈጻጸም ሪፖርት ላይ አመላክቷል።

ሚኒስቴር መስሪያ ቤቱ በድህረ ፈቃድ ኢንስፔክሽንና ሬጉላቶሪ ቡድን አማካኝነት በ3 ሺህ 330 የንግድ ድርጅቶች ላይ የማጣራት ስራ ለመስራት አቅዶ በ 1 ሺህ 868 የንግድ ፋይሎች ላይ የፍተሻ ስራ መስራቱንና የዕቅዱን 56 ነጥብ 1በመቶ ማከናወኑ ተገልጿል።

በተመሳሳይ በ480 የንግድ ድርጅቶች ላይ የውጪ ፍተሻ ስራ ለማድረግ አቅዶ በ 421 የንግድ ድርጅቶች ክትትልና ቁጥጥር ማድረጉ ተጠቁሟል።

ክትትል ካደረገባቸው 421 ድርጅቶች ውስጥ ም 127ቱ በተለያየ ደረጃ የአዋጅ ጥሰት የታየባቸው፣ 67 ድርጅቶች ፈቃዳቸው የተሰረዘ፣ 28ቱ በድጋሚ በክትትሉ ወቅት ያልተገኙ እንዲሁም ቀሪዎቹ 199 በህግ አግባብ እየሰሩ መሆኑ በሪፖርቱ ተመላክቷል።

እንዲሁም በውጪ የፍተሻ ስራ ክትትል ከተደረገባቸው 421 የንግድ ድርጅቶች ውስጥ 199ኙ በትክክለኛው የህግ አግባብ እየሰሩ ያሉ፣ 67 የንግድ ድርጅቶች ፈቃዳቸውን የሰረዙ መሆኑ ነው የተገለጸው።

ቀሪዎች ደግሞ የአስመጪነት ፈቃድ እያላቸው በችርቻሮ ንግድ ላይ የተሰማሩ ፣ ተመሳሳይ ግብይት ሲያከናውኑ የተገኙ ፣ ተመሳሳይ ደረጃ ግብይት እና ከዘርፍ ውጪ የሚነግዱ ፣ ከአድራሻ ውጪ የሚነግዱ፣ የመሸጫ ዋጋ በተገቢ ቦታ ያለጠፉ መሆናቸውን የፍተሻው ውጤት ያሳያል።

ችግሮቹን ለመቅረፍም በተለያየ ደረጃ የቃል እና የጽሁፍ ማስጠንቀቂያ የተሰጠ ሲሆን፥ ይህንንም ተከትሎ አንዳንድ ድርጅቶች እርምት እያደረጉ መሆን ከሚኒስቴሩ ያገኘነው መረጃ ያመላክታል።

You might also like
Comments
Loading...