Fana: At a Speed of Life!

የፍየል መንጋ የሮናልድ ሬገንን ቤተ መጽሃፍ ከእሳት ቃጠሎ ታድጎታል

አዲስ አበባ፣ ጥቅምት 21፣ 2012 (ኤፍ.ቢ.ሲ) የቀድሞው የአሜሪካ ፕሬዚዳንት ሮናልድ ሬገንን ቤተ መጽሃፍ ከካሊፎርኒያ ሰደድ እሳት የታደገው የፍየል መንጋ በብዙዎች ዘንድ አድናቆትን አትርፏል።

ካሊፎርኒያ ከአሜሪካ ግዛቶች ተደጋጋሚ የሰደድ እሳተ እንደሚጎበኛት ይታወቃል።

ሰሞኑን በግዛቲቱ ሰደድ እሳት መነሳቱን ተከትሎም እሳቱ በበረታባቸው የግዛቲቱ አካባቢዎች የሚገኙ ነዋሪዎች ከመኖሪያቸው ተፈናቅለዋል፤ በአደጋው የተለያዩ ንብረቶች መውደማቸውም ተገልጿል።

በዚች ግዛት የሚገኘውና በቀድሞው የአሜሪካ ፕሬዚዳንት ሮናልድ ሬገን የተሰየመው ቤተ መጽሃፍት ግን በአስገራሚ ሁኔታ ከእሳት አደጋው ተርፏል።

ቤተ መጽሃፍቱ ዙሪያውን ለሰደድ እሳት ምቹ በሆኑ ዕፅዋትና ሳር ቢከበብም በአቅራቢያው በሚገኘው የፍየል መንጋ አማካኝነት መትረፉ ታውቋል።

የእሳት አደጋ ባለሙያዎች በአንዳንድ አካባቢዎች ሰደድ እሳት በሚነሳበት ወቅት እሳቱ በስፋት እንዳይዛመት በአካባቢው ያሉትን ተቀጣጣይ ነገሮች ማስወገድ አስፈላጊ መሆኑን ይመክራሉ።

በዚህ መሰረትም በተለያዩ ተቀጣጣይ ሳር መሰል ተክሎች የተከበበው የሮናልድ ሬገን ቤተ መጽሃፍት ተቀጣጣይ ተክሎችን ለማስወገድ 500 ፍየሎችን በቅጥር መልኩ በቦታው ያሰማራል።

ይህ የተራበ የፍየል መንጋም በቤተ መጽሃፍቱ ዙሪያ የበቀሉትን የተለያዩ ተቀጣጣይ ሳር መሰል ተክሎችን በመመገብ ቦታውን ከተቀጣጣይ ነገሮች የመከላከል ስራውን አጠናክሮ ይቀጥላል።

ይህም ከሰሞኑ በአካባቢው የተከሰተው ሰደድ እሳት በፍጥነት ተዛምቶ ቤተ መጽሃፍቱን እንዳያቃጥለው ከፍተኛ አስተዋጽኦ ማበርከቱ ነው የተነገረው።

ሰደድ እሳቱ ቤተ መጽሃፍቱ አካባቢ ቢደርስም በዙሪያው ያለው ተቀጣጣይ ተክል በፍየሎች በመበላቱ ፍጥነቱን በመቀነስ አደጋውን በቀላሉ መቆጣጠር መቻሉን የእሳት አደጋ ባለሙያዎች ገልጸዋል።

የቤተ መጽሃፍቱ ሥራ አስኪያጅ ሜሊሳ ጊለር በበኩላቸው የፍየሎች ተክሎቹን እንዲበሉ በቦታው መሰማራት የእሳት አደጋ ሠራተኞችን ስራ ከማቅለሉም ባለፈ ቤተ መጽሃፍቱን ከውድመት መታደጉን ተናግረዋል።

ምንጭ፦ ቢቢሲ

You might also like
Comments
Loading...