Fana: At a Speed of Life!

የኢትዮጵያና የተባበሩት ዓረብ ኢሚሬቶች የመጀመሪያው የፖለቲካ ምክክር ተካሄደ

አዲስ አበባ፣ ጥቅምት 27፣ 2012 (ኤፍ.ቢ.ሲ) የኢትዮጵያና የተባበሩት ዓረብ ኢሚሬቶች የመጀመሪያው የፖለቲካ ምክክር በአቡዳቢ ከተማ በትናንትናው እለት ተካሄዷል።

በተባበሩት ዓረብ ኢሚሬቶች የውጭ ጉዳይ እና ዓለም አቀፍ ትብብር ሚኒስትር የፖለቲካ ዘርፍ ሚኒስትር ዲኤታ ከሊፋ ሻሂን፥ በተባበሩት ዓረብ ኢሚሬቶችና በኢትዮጵያ መካከል ያለው ግንኙነት ከጊዜ ወደ ጊዜ እየተጠናከረ መምጣቱን ገልፀዋል።

ከግንኙነቱ የሁለቱም ሀገራት ሕዝቦች ተጠቃሚ የሚሆኑበትን ሁኔታ ለማመቻቸትም ይህ የፖለቲካ ምክክር መድረክ እጅግ እስፈላጊ መሆኑንም ተናግረዋል።

አያይዘውም የሁለቱም ሀገራት መሪዎች የኢትዮጵያና የተባበሩት አረብ ኢሚሬቶች ግንኙነትን ለማሳደግ የያዙትን የጋራ ራዕይ ለማሳካት ይቻል ዘንድ በሁለቱም ሀገራት በኩል ከጊዜ ወደ ጊዜ የከፍተኛ ባለስልጣናት ጉብኝት እየጨመረ መምጣቱ ጠቅሰዋል።

አያይዘውም በኢኮኖሚው ረገድም የንግድ፣ ቱሪዝም እና ኢንቨስትመንት ፍሰቱ እያደገ መሆኑን አስታውሰው፤ በተለይም ኢትዮጵያ በኤክስፖ 2020 የምታደርገው ተሳትፎ ሀገሪቱን ለዓለም ዓቀፉ ማህበረሰብ ይበልጥ ለማስተዋወቅ ምቹ አጋጣሚ እንደሚሆን አስረድተዋል።

በሌላ በኩል ኢትዮጵያ በአፍሪካ ቀንድ ሰላምና መረጋጋት ለማስፈን የምታደርገውን ጥረት አድንቀው፥ ጠቅላይ ሚኒስትር ዶክተር አብይ አህመድ የ2019 የሠላም ኖቤል ተሸላሚ በመሆናቸው የተሰማቸውን ደስታ ገልጸዋል።

የውጭ ጉዳይ ሚኒስትር ዲኤታ ወይዘሮ ሂሩት ዘመነ በበኩላቸው፥ የተባበሩት ዓረብ ኢሚሬቶች ኢትዮጵያ በኤክስፖ 2020 እንድትሳተፍ ላደረገችው ድጋፍ ምስጋናቸውን አቅርበዋል።

ኢትዮጵያ ከመካከለኛው ምስራቅ ሀገራት ጋር ታሪካዊ ግንኙነት እንዳላት ያነሱት ወይዘሮ ሂሩት፥ ይህ የመጀመሪያው የፖለቲካ ምክክር ስብሰባም በሁለቱ ሀገራት መካከል ያለው የጋራ ራዕይ መገለጫ መሆኑን አውስተዋል።

በስብሰባው ወቅት የኮንሱላር እና የሁለትዮሽ ትብብር ጉዳዮች፤ የልማት ትብብር እንዲሁም የሁለቱም ሃገራት ትኩረት በሆኑ ቀጠናዊ እና ዓለም አቀፋዊ ጉዳዮች ዙሪያ ውይይት ማድረጋቸውን በተባበሩት ዓረብ ኢሚሬቶች የኢትዮጵያ ኤምባሲ ለፋና ብሮድካስቲንግ ኮርፖሬት በላከው መረጃ አስታውቋል።

ከዚሁ ጋር በተያያዘ የሀገራቱን ኢኮኖሚ እና የህዝብ ለህዝብ ትስስሩን ለመደገፍና የዜጎች መብት ጉዳይ ላይ በጋራ ለመስራት እንዲረዳ የኮንሱላር መግባቢያ ሰነድ በተፈረመው መሠረት የመጀመሪያውን ፎረም በቅርቡ ለማድረግ ስምምነት ላይ ተደርሷል።

በኮንሱላር ፎረሙ ወቅት ወደ ተባበሩት ዓረብ ኤምሬቶች ለስራ የሚመጡ ኢትዮጵያውያን ህጋዊ መንገድ ተከትለው የሚመጡበት እና በሀገሪቱ የሚገኙ ኢትዮጵያውያንም መብትና ክብራቸው ተጠብቆ እንዲሠሩ ለማድረግ የሚያስችሉ ስልቶችን መቀየስ አስፈላጊ መሆኑ ተነስቷል።

በልማት ትብብር ረገድ የተባበሩት ዓረብ ኢሚሬቶች የጾታ እኩልነትን ያገናዘበ ነጻ የትምህርት እድል ለኢትዮጵያውያን ለመስጠት የወሰነች ሲሆን፥ በሀገራቱ የዲፕሎማቲክ አካዳሚዎች መካከል የልምድ ልውውጥ ማድረግ የሚያስችል መድረክ መፍጠር አስፈላጊ መሆኑ ተገልጿል።

You might also like
Comments
Loading...