Fana: At a Speed of Life!

የኢራቁ ጠቅላይ ሚኒስትር አብዱል ማህዲ ስልጣን ሊለቁ ነው

አዲስ አበባ ፣ ህዳር 20 ፣ 2012 (ኤፍ ቢ ሲ) የኢራቁ ጠቅላይ ሚኒስትር አዴል አብዱል ማህዲ ስልጣናቸውን እንደሚለቁ አስታወቁ።

ጠቅላይ ሚኒስትሩ ለሳምንታት ከዘለቀው ህዝባዊ ተቃውሞ በኋላ የመልቀቂያ ደብዳቤያቸውን ለሃገሪቱ ፓርላማ እንደሚያስገቡ ይፋ አድርገዋል።

ይህን ተከትሎም በርካታ የሃገሬው ዜጎች ደስታቸውን አደባባይ በመውጣት እየገለጹ ነው።

በርካቶች ግን ከጠቅላይ ሚኒስትሩ የእለቃለሁ ማስታወቂያ ይልቅ አጠቃላይ የሃገሪቱ ፖለቲካዊ ሂደት ላይ ስር ነቀል ለውጥ እንፈልጋለን እያሉ ነው፤ መልቀቂያው የመጀመሪያው እርምጃ መሆኑን በመጥቀስ።

በኢራቅ መንግስትን የሚቃወሙ ህዝባዊ ሰልፎች ካለፈው ወር መጀመሪያ ጀምሮ ሲካሄዱ ቆይተዋል።

በእነዚህ ቀናትም በተለይም በመዲናዋ ባግዳድ እና በአብዛኛው የሺዓ ሙስሊሞች በሚገኙባቸው ደቡባዊ የሃገሪቱ ከተሞች በርካቶች በፀጥታ አካላት ለህልፈት ተዳርገዋል።

ከሁለት ቀናት በፊትም በእነዚህ ከተሞች ከ50 በላይ ኢራቃውያን ከፀጥታ አካላት ጋር በተፈጠረ አለመግባባት መገደላቸው ተሰምቷል።

ተቃውሞው ከጀመረበት ጊዜ ጀምሮም እስካሁን ወደ 400 የሚጠጉ ዜጎች መገደላቸው ይነገራል።

የሺዓ መንፈሳዊ መሪው አሊ አል ሲስታኒም መንግስት የሃይል እርምጃ መውሰዱን በተደጋጋሚ ሲያወግዙ ቆይተዋል።

ጫናውን የበረታባቸው ጠቅላይ ሚኒስትር አብዱል ማህዲም ስልጣናቸውን እንደሚለቁ ይፋ አድርገዋል።

የሃሪቱ ፓርላማም አዲሱን ጠቅላይ ሚኒስትር ይሰይም ብለዋል፥ ትናንት በተወካያቸው አማካኝነት ባስተላለፉት መልዕክት።

ፓርላማው መልቀቂያውን ካጸደቀው፥ የሃገሪቱ ፕሬዚዳንት አዲሱን የመንግስት ካቢኔ የሚመሰርተውን እጩ ይሰይማሉ ተብሎ ይጠበቃል።

 

ምንጭ፦ አልጀዚራ

 

 

You might also like
Comments
Loading...