Fana: At a Speed of Life!

የኢህአዴግ ስራ አስፈጻሚ ኮሚቴ  በውህደት ዝርዝር ጥናት ላይ ተወያይቶ በአብላጫ ድምፅ ከስምምነት ደረሰ

አዲስ አበባ፣ ህዳር 6፣ 2012 (ኤፍ.ቢ.ሲ) የኢትዮጵያ ህዝቦች አብዮታዊ ዴሞክራሲያዊ ግንባር ስራ አስፈጻሚ ኮሚቴ የኢህአዴግ የውህደት ዝርዝር ጥናት ላይ ተወያይቶ በአብላጫ ድምፅ ከስምምነት መድረሱን አስታወቀ።

ስራ አስፈጻሚ ኮሚቴው በዛሬው ዕለት ባካሄደው ስብሰባ የግንባሩን የውህደት ዝርዝር ጥናት በ6 ተቃውሞ በአብላጫ ድምፅ አጽድቋል።

የኢህአዴግ ስራ አስፈፃሚ ኮሚቴ አባል አቶ ፍቃዱ ተሰማ ጉዳዩን አስመልክተው ከኢቢሲ ጋር ባደረጉት ቆይታ፥ ኮሚቴው በውህደቱ ማዕቀፍ ውስጥ ትኩረት ሊደረግባቸው የሚገቡ ዋና ዋና ጉዳዮችን በስፋት እንስቶ መወያየቱን ተናግረዋል።

በዚህም ህብረ ብሔራዊ ፌዴራሊዝም ተጠናክሮ በሚቀጥልበትና የራስ አስተዳደር በሚጎለብትበት ሁኔታ ላይ ትኩረት ሰጥቶ በዝርዝር መወያየቱን ነው የገለጹት።

የቋንቋ ብዝሃነት፣ የብሔር እና ሀገራዊ ማንነትን ሚዛኑን በጠበቀ መልክ እንዲጠናከር የሚሉት ጉዳዮችም በመድረኩ ላይ ምክክር ተደርጎባቸዋል ነው ያሉት።

በመሆኑም ሁሉንም ብሄር ብሔረሰቦች ያማከለ ፍትሃዊ ውክልና በአዲሱ ውህድ ፓርቲ ውስጥ እንዲኖር በዝርዝር ተመክሮበታል ብለዋል።

ኮሚቴው በነገው ዕለትም ለወደ ፊቱ ውህድ ፓርቲ በተቀረፀው ረቂቅ ፕሮግራም ዙሪያ የሚወያይ መሆኑን አቶ ፍቃዱ ተናግረዋል።

You might also like
Comments
Loading...